London Stadium-ah Man United an 'comeback'

West Ham United-in Inrinni zan khan Manchester United lakah Tomas Soucek hmangin goal khung hmasa mah se Ole Gunnar Solskjaer-a hoten second half-ah Paul Pogba, Mason Greenwood leh Marcus Rashford te goal hmangin an chhanglet.

London Stadium-a entu mipui 2,000 hmaah Man United-in 3-1 in hnehna an chang. Solskjaer hote hian tun season league match khualmuala vawi nga an khelhah goal an chhuah hmasa vek a, hnehna an chang vek thung.

Man United hi khualmualah a zawnin vawi kua an chak tawh a, club record a ni. Solskjaer hote hian match 10-ah point 19 an hmu a, a sang pali zingah an inhlangkai. Hammers erawhin match 11 aṭangin point 17 an hmu a, pasarihnaah an awm.

Norwegian manager Ole Gunnar Solskjaer-a'n Champions League-a RB Leipzig nen inkhel pawimawh an khelh tur hre rengin Bruno Fernandes leh Marcus Rashford te bench-ah a dah a, bul ṭantu zingah Paul Pogba, Donny Van de Beek, Anthony Martial, Mason Greenwood leh Edinson Cavani te an tel.

London Stadium-ah United player-ten awmze neiin ball an inpe thei lo a, Cavani-a'n ball ṭha a hmuh loh bakah Martial-a'n ball a hloh nasa hle. Minute 38-naah ven loa awm Tomas Soucek-a'n Hammers goal hmahruai a khung.

West Ham-in first half-ah goal khat chauh an khung hi an vanduai hle. Pablo Fornals-a'n goal ban a pet per a, Sebastien Haller-a'n inhliam David de Gea aia lut Dean Henderson a bum vek hnuah a tawlh thlu. Man United an vannei takzet.

Jarrod Bowen-a'n United tlarhnung a rum ṭhaih a, offside vangin a goal khung pawm a ni lo. Hei bakah hian counter attack hmangin goal khung theihna hun ṭha a nei a, Aaron Wan Bissaka-a'n a tackle hman. A tawi zawngin David Moyes-a hoten an mikhual te hi an  en nau hle.

Second half-ah Bruno Fernandes leh Rashford an lut a, inkhel kalhmang a dang daih. Man United player-ten inrintawkna an nei let a, inkhel hmuhnawm an lantir ta zawk.

Minute 65-naah keeper Henderson-a ball pet chhuah chu Bruno Fernandes-a'n la lutin Paul Pogba-a pe a, French midfielder hian player class bik chauh khung theih danin a pet goal. 

Henderson-a ball pet chhuah hi a 'out' hman anga a lan avangin VAR hmangin en let a ni a, mahse en letna tur video ṭha a awm loh avangin pawm loh chu tih theih dang a awm lo.

Minute thum hnuah Alex Telles-a pass chu Mason Greenwood-a'n nalh fahrana petna tur insiamin ṭha zetin a pet goal. Minute 78-naah Rashford-a'n substitute Juan Mata ball fing zet chu goal-ah a chantir bawk. 

Man United-in second half an thunun hlak a, goal tam zawk khung theihna tur hun ṭha an bawhpelh. Chutihrualin inkhelh ṭantirh minute 45 thlirlet chuan West Ham an vanduai a, first half-ah goal khat aia tam khung se chuan point thum an hlawhchhuahna inkhel a ni thei ang.

United manager Ole Gunnar Sols-kjaer chuan, "Inpeih rengin Bruno leh Marcus te an awm a, an khel ṭha hle. Goal kan khungte kha a ṭha em em vek. Greenwood-a finishing ṭhatzia kan hmu a, tun season-a a theihna tak tak a lantir hun hi kan nghakhlel a, fitness lamah hma a sawn zel. Paul Pogba goal khung kha, a ṭha thlawt - ka lawmpui hle," tiin a sawi.

Norwegian manager chuan sawi chhunzawmin, "Kan khel ṭha lo chungin kan rilru huaisenna rah kan seng a, point thum hlu tak kan hlawh chhuak," tiin first half-ah an khel ṭha tawk lo tih a pawm.

West Ham manager David Moyes chuan, "Touchline bulah khan ka awm a, ball kha ka lu chungah a thlawk. Player chet dan thlir pawh khan ball khan line a pelah an ngai vek tih a hriat. Kan beisei loh zawngin thutlukna a kal a, kan vanduai phah ta a ni," tiin thutlukna dik lo awm chu pawi a tih thu a sawi.