NBA All-Star Game 2020 Team LeBron an chak, MVP atan Leonard
NBA All-Star Game 2020-ah Team LeBron-in 157-155 in Team Giannis an hneh a, point 30 score-tu Los Angeles Clippers forward Kawhi Leonard chuan MVP Award a dawng. Kumin MVP Award hi helicopter vanga nunna chan Kobe Bryant hriatreng nan Kobe Bryant All-Star MVP Award tih a ni.
A tawp kharna
Team LeBron hi first quarter-ah 53-41 in an chungnung a, second quarter-ah Team Giannis cheṭha zawkin 51-30 in hnehna an chang. Third quarter-ah 41 ve ve an score a, quarter tawp ber hmain Team Giannis-in 133-124 in hma an hruai.
Kobe Bryant hriatreng nan fourth quarter-ah hun bithliah a awm tawh lo a, point hmu tam zawk Team Giannis point hmuh 133-ah Bryant-a number 24 an belh a, target score chu 157 a ni. Target score hmu hmasa zawk hian hnehna an chang dawn.
Team Giannis dinhmun a ṭha zawkah a ngaih theih a, amaherawhchu point 24 hmuh belh a awlsam lo. MVP atana thlan Leonard-a'n point 30-na a score chiahin Team LeBron-in point 150 an nei a, Team Giannis nen an point neih zat inang chiah.
Point sarih hmu hmasa zawk an chak dawn avangin boruak a ṭang a, Lakers star Anthony Davis-a'n hmahruaina a khung. Team LeBron-in hnehna an chan hma erawhin 156-155 a ni a, tu zawk pawh chak thei an la ni tho. Anthony David-a'n freethrow hmuin a hmasa zawk hlah mah se a hnuhnung zawkah khungin Team LeBron-in target 157 an thleng.
Kawhi Show
Kawhi Leonard-a'n All Star-a vawi li a telnaah 30 points neiin rebound pasarih, assists pali leh steal pahnih a nei a. Los Angeles Clippers forward hi first half-ah a langsar lehzual a, point 30 a neih zinga 25 hi first half-a a khung a ni.
Leonard hian 3-point vawi 14 luh a tumah vawi riat a lut a, All Star Game hrim hrimah hian vawi 18 attempt-ah vawi 11 a lut. Kum 28 mi Kawhi Leonard chuan, "Kobe Bryant MVP trophy hmasa ber dawngtu ka nih avanga ka lawmzia hi thuin a sawifiah zo lo. Tun dinhmun ka thlenna tura Kobe min puihna zawng zawngah ka lawm a, ka chawimawina dawn pawh hi a tan ka hlan," tiin a sawi.
Leonard hian MVP ni tur hian vote 12 a hmu a, amah hnaih bertu LeBron-a'n vote thum chiah hmuin Anthony Davis leh Chris Paul ten vote khat ve ve an hmu bawk.
All Star Weekend Thlirna Tawi
Slam Dunk Contest Derrick Jones Jr., Miami Heat
3-Point Contest Buddy Hield, Sacramento Kings
Skill Challenge Bam Adebayo, Miami Heat
Rising Stars Game Team USA 151 - 131 Team World
NBA All-Star Celebrity Game Team Wilbon 62 - 47 Team Smith