Napoli stadium hming Stadio Diego Armando Maradona

Italian club Napoli chuan an stadium hming chu an club legend Diego Maradona hming chawiin an thlak ta a, Stadio San Paolo tia hriat ṭhin khelmual chu Stadio Diego Armando Maradona tia hriat a ni tawh ang. 

Argentine attacking midfielder hlui hi November 25 khan kum 60 mi niin a thi a, mi tam takin khawvela footballer piang tawh zinga thiam bera an ngaih hian a vanglaiin Napoli-ah hun duhawm tak a hmang hman. 

Italian club tan hian season sarih a khel  a, a zawm tirha club naran ve tak hi Serie A nomawi vawi hnih a chawipui bakah Coppa Italia, UEFA Cup leh Supercoppa Italiana-ah te a champion pui a ni. 

Maradona thih hnu khan Napoli neitu Aurelio de Laurentiis chuan stadium hming thlak duhin open letter a ziak a, Naples mayor Luigi de Magistris chuan a thlawp bawk - mahni duhthua thlak ngawt theih erawh a ni lo.

Napoli club innghahna Naples City Council lamin an pawmpui phawt a ngai. City Council chuan thuchhuah siamin, "Hming thlakna tur pawmpuiin City council member-te chuan an hming an ziak hnan vek a ni," an ti. 

City Council chuan Maradona chu khawvela footballer ropui ber a nih thu an sawi lang a, "A thiamna leh magic ropui tak hmangin Napoli team jersey chu kum sarih chhung a chawimawi a, he khaw pumpui hian tawp chin awm loa hmangaihnain an chhanglet thung a ni," an ti. 

Maradona hian Napoli tan match 188 khelin goal 81-a khungsak a, a career-ah Italian club tan aia match khelh tam zawkna club a nei lo.