Bayern leh Leipzig an inhnehtawk

Bundesliga inkhel pawimawhah Bayern Munich leh RB Leipzig te 3-3 in an inhnehtawk. Allianz Arena-a inkhelah hian European champion hi siphurh suttu zawk an ni a, Champions League-a Manchester United khingpui tur RB Leipzig hi team satliah an ni lo tih a chiang.

Inrinni zan inkhelah Leipzig tan Christopher Nkunku, Justin Kluivert leh Emil Forsberg ten goal khat ṭheuh an khung a, Bayern Munich tan Thomas Muller-a'n goal hnih a khung bakah rawlthar duhawm Jamal Musiala-a'n a khung ve bawk.

Bavarians-in point hnih an hloh hma hian Borussia Dortmund-in hmahruaitu hnaih theihna hun ṭha an bawhpelh a, Lucien Favre-a hote hi Eintracht Frankfurt nen 1-1 in an inhnehtawk.

Allianz Arena-ah inkhel nung tak hmuh tur a awm nghal a, Marcel Sabitzer-a'n crossbar a tih per nghal. Leipzig hian Bayern mualah match li chhung goal an khung tawh lo a, tun ṭumah erawh goal chance an nei ṭha thei hle.

Bayern captain Manuel Neuer hi sweeper-keeper tih khawpa tlan chhuak tam a ni a, Leipzig nen erawh a chesual. German keeper Neuer hian Emil Forsberg 'through ball' pek chu la hman turah inngaiin a tlan chhuak a, amaherawhchu Christopher Nkunku-a'n Bavarians keeper hi bumin minute 19-naah goal hmahruai a khung.

Minute 30-naah kum 17 mi Jamal Musiala-a'n mawi zetin Bayern siphurh sutna goal a khung a, Stuttgart-a piang Musiala hi Chelsea-a inzir ṭhin niin Enland youth team tana khel a ni. A khelh dan thlirin Blues-in player ṭha an chanah a ngaih theih bawk.

Bavarians-in Thomas Muller hmangin minute 34-naah hma hruai ve mah se Leipzig-in Justin Kluivert hmangin minute hnih hnuah an sut. Second half ṭan chiahah Emil Forsberg-a'n Leipzig hmahruaina goal a khung leh a, Bayern chak lo thei dinhmunah an ding.

Minute 75-naah Kingsley Coman-a cross chu Thomas Muller-a'n a tauh goal a, 3-3 a ni chiah. Germany national team coach Joachim Low-a'n player thlan chungchangah ngaihtuahna a seng ṭha a nih chuan Muller aia Euro 2020 khel tur chuang an awm lo, tih a hria ang.

Bayern Munich boss Hansi Flick chuan, "Inkhel danglam tak a ni a, team pahnih tlarhnung a ṭha tawk lo ve ve. Ven theiha ngaih goal kan chhuah a, kan inrem dan a dik lo. Kan khingpuiten chance tam tak an insiam a, chutirhualin a lawmawm lai erawh hun harsa aṭangin kan tho chhuak," tiin an khel ṭha tawk lo tih a pawm.

Leipzig head coach Julian Nagelsmann chuan, "Entu lam tan chuan inkhel hmuhnawm tak a ni ngei ang. First half-ah khan chance tam tak kan nei a, Bayern ai khan ni khata chawlh kan neih tlemna second half-ah khan a lang. Ka naute khelh danah ka lungawi," tiin a sawi.