Hardik Pandya-a'n India chakpui

India-in nimin khan T20-ah Australia chu wicket rukin an hneh a, match thum khelh turah vawi hnih an chak tak avangin series an la chiang tawh.

December 8, Thawh-lehni hian T20 match thumna khelh a ni dawn a, Virat Kohli hoten 3-0 a chak theihna hun ṭha an nei an ni.

Sydney Cricket Ground-a inkhelah India-in vawm hmasak an thlang a, Australia-in run 194/5 tehmeuh an siam. Aussie tan opener Matthew Wade-a'n run 58 siamin Steve Smith-a'n run 46 a siam ve bawk.

India-in target sang tak um mah se opener KL Rahul (30) leh Shikhar Dhawan (52) ten bul an ṭan ṭha a, Virat Kohli-a'n run 40 a rawn belh bawk.

Over tawp berah India tan run 14 siam a la ngai a, Aussie tan Daniel Sams  a rawn pen chhuak. India tan Hardik Pandya-a'n a hmachhawn a, ball hmasa berah run hnih siamin ball hnuhnung pathum aṭangin six vawi hnih a vaw chhuak a, hnehna an chanpui.

India hian over 19.4-ah run 195/4 an siam a, Hardik Pandya hian ball 22 lek aṭangin run 42 a siam a, Shreyas Iyer-a'n ball nga lek aṭangin run 12 a siam ve bawk.