Chawlh ka tum hman - Ibra

Zlatan Ibrahimovic chuan kumin nipui lai khan inkhelh chawlhsan a tum hman thu a sawi a, mahse a thutlukna siam tawh thlak lehin tun season a inkhel chhunzawm leh ta zawk a ni.

Kum 39 mi Ibra hian LA Galaxy tana a contract a hman zawh hnuah Milan hi thla ruk chhung atan a zawm a, a kum tam deuh tawh mah se goal khung thei bik a neihna a chhawm nung reng.

Season hmasa zawh rual khan Ibra hian inkhelh chawhsan a duh thu Milan manager Stefano Pioli a hrilh hial. Ibra chuan, "Ka inkhel chhunzawm tawh lo ang, ka chhungte kalsanin Milan khawpuiah keimah chauhin ka awm.

"Ka khup hliam vangin inkhelh chhunzawm zel ka zuam lo bawk, tiin Pioli hnehah ka hrilh. Ani chuan ka dinhmun a hriat thiam thu a sawi, mahse vawi khat sawi chauh chu duhtawk loin, inbiakna neih leh a duh thu min hrilh," tiin a sawi.

Swede striker chuan rilru a thlak thu sawi zuiin, "Thil kal dan a inthlak a, keimah zawkin Milan va bia in inkhelh zel ka duh thu ka va hrilh. A nihna takah chuan Manchester United tana ka khelh lai khan chawlh chu ka ngaihtuah daih tawh," a ti. 

AC Milan hmatawng Ibra hian Serie A season kal laiah match ruk a khelh aṭangin goal 10 a khung der tawh a, ani aia khung hnem an awm lo.