Juventus leh Inter an chak

Inrinni zan Serie A inkhelah champion lai Juventus leh Inter Milan ten hnehna an chang a, season dang zawng aiin tun season chu Italian champion nih tuma inelna boruak a sang chhunzawm zel dawn.

Turin khawpuia club awm pahnih Juve leh Parma inkhelah Old Lady lamin 2-1 in hnehna an chang hram. Antonio Conte enkawl Inter erawhin Bologna lakah harsatna an tawk lo, nuamsa takin 3-1 in hnehna an chang.

Inkhel dangah beisei anga season bul ṭan fuh lo Lazio chuan Spezia 2-1 a hnehin an dinhmun an siam ṭha ve zel, point 17 hmuin pasarihna an ni. Spezia erawh 15-naah an awm, inhamtang tur chuan vanneihna an mamawh tel dawn.

Allianz Stadium a inkhelah Juventus lamin chak turin vanneihna an mamawh. Mikhual Torino lamin minute kuana lekah Nicolas Nkoulou hmangin goal hmahruai an khung, hun rei tak chhung chu Juve lamin an sut thei lo.

Cristiano Ronaldo vanneih zan a ni lo a, tun season Serie A match bikah a vawi hnih nan Torino an chak mai dawn niin a lang hman. Mahse minute 77-naah substitute Weston McKennie chuan si phurh a sut hram.

Hun tawp hamrik a rik hma chiahin Juan Cuadrado-a cross chu defender rinrawl Leonardo Bonucci chuan chakna goal atan a khung. Match 10 aṭanga point 20 hmuin pathumna dinhmun an luah.

Juve manager Andrea Pirlo chuan, "Derby a nih tawh chuan a boruak a danglam a, inkhelh a harsa ṭhin. Inkhel chawhnu lamah khan Juventus kan nihna tak kan lantir thei a, chak duhna thinlung neih pawimawh zia a takin kan hmu," a ti.

Manchester United duh loh Romelu Lukaku chuan Inter Milan tan goal a khung chhunzawm zel. Belgium international striker bakah hian Achraf Hakimi chuan goal hnih khungin nuamsa takin hnehna an chang.

Lukaku-a'n tun season Serie A bikah goal riat a khung tawh a, ani aia khung hnem chu AC Milan striker palian Zlatan Ibrahimovic (10 goals) chauh a ni, club bakah mimal goal khung hnem lamah an inel zel dawn.

Inter coach Conte chuan, "Bologna kha team ṭha tak an ni a, goal khung hmasa mah ila hlauhthawng loin min bei let zel thei. July thla a kan intawn hnuhnung khan kan player pakhat hnawh chhuah niin 2-1 in kan chak lo a nih khan.

"Tunah chuan chanchin a danglam ta, ka naute khan inrintawkna sang tak nen an khel a, famkim lo lai chu la awm mah se a lungawi thlak hle," tiin a sawi. Italian manager hian Dortmund aṭanga loan hmanga an hawh Hakimi chu Inter player tur tak a nih thu a sawi bawk.