NorthEast-in ro hlu an Chhar e!

Indian Super League club NorthEast United-in ro hlu tak an chhar a, a hming chu Rochharzela a ni - Chhinga Veng tlangval hian Inrinni zan khan Indian Super League-ah NorthEast United tan goal-a khung. 

NorthEast United hi East Bengal nen an inkhel a, 2-0 in an chak. Goal hmasa zawk hi East Bengal defender Surchandra Singh-a'n an lama a tih luh a ni a, bench aṭanga luhtir Chhara'n hun pek belhah a khung belh. 

Zirtawpni zan khan ISL inkhel pakhat a awm bawk a, Bengaluru FC chuan captain Sunil Chhetri-a penalty hmangin Chennaiyin FC chu 1-0 in an hneh. 

NorthEast-in minute 33-na lekah goal hmahruai an khung a, ISL-a Highlander goal 100-na khungsaktu hi East Bengal defender Surchandra Singh a ni. 

Highlander winger Ninthoinganba Meetei-a long ball chu Idrissa Sylla-a'n  Kwesi Appiah ke bulah a tauh thla a, Appiah hian Sylla tan a siam let zui. 

Mahse, Queens Park Rangers forward hlui Sylla-a'n ball a tawh fuh hmain Surchandra chuan a kein a lo tawk fuh a, Manipur defender hian an lamah a ti lut.

Highlander tan Lalengmawia chu Mizo player bul ṭan awmchhun a ni a, Rochharzela chu minute 64-naah luhtir a ni thung. Khelmual a luh aṭangin Chhara a hmuhnawm nghal a, East Bengal tan hnawksak a tling. 

Mizoram Premier League leh Aizawl FC chhul chhuak forward hian hun pek belh minute khatnaah goal a hlawh chhuak ta nge nge a, amah ang thoa bench aṭanga luhtir VP Suhair siamsak chu goal-ah a chantir. 

NorthEast United goal luh nana Chhara chet ranna leh tlan chakna chu hmuh hmaih theih a ni lo a, amah vengtu, season hmasa lawka Brisbane Roar tana A League khel Scott Neville-a'n tih theih a nei lo. 

Highlander tan Apuia'n inkhel bul a ṭan a, Lalrempuia Fanai leh Rochharzela-te bench-ah dah an ni a, Lalkhawpuimawia chu ni 14 ngawt quarantine a nih avanga ngai a la awh hman loh avangin squad-ah a la tel lo. 

Chhara hi ni 10 quarantine-a nih hnuah kar hmasa FC Goa lakah khan bench aṭanga luhtir a ni tawh a, mahse 100% a fit erawh a la ni lo. Aizawl FC forward hlui chuan, "Kan inkhunghran reng hnuah training kan zawm a, a hautak em avangin ka taksain a la zo lo deuh. 

"Duh ang taka tlan leh chet pawh ka la harsat a, 100% a fit ka la ni lo," tiin a ṭhat dan bera a la khelh loh thu Vanglaini a hrilh a, a pawimawh ber goal-a khung miau avangin a lawm erawh a lawm ang. 

Chhara hian season hmasa khan Aizawl FC tan I League-a khel a, match 15-ah goal ruk a khung thei. ISL-ah a season hmasa ber a hmang a, goal nga tal khung a tum. 

Chhinga Veng tlangval chuan, "Sawi thiam a harsa a, engkim hi Pathian thu a ni. Mahse, keimah lam ka inruahmannaah chuan goal nga tal khung tlin theih chu a châkawm khawp mai," tiin Vanglaini a hrilh. 

Tun season Indian Super League-ah Chhara hi Mizoram player zinga goal khung hmasa ber a ni a, Inrinni zana East Bengal nen an inkhelah Jeje Lalpekhlua chu Kolkata club hian bench lamah an ṭhut tluantir. 

ISL season tinin NorthEast United hi rin hlawh an ni ngai lo - tun season-ah erawh match li an khelhah vawi hnih an chak a, vawi hnih an khingpui inhnehtawkpui tawhin result an nei ṭha hle. 

Chhara chuan an coach Gerard Nus fakin, "A thawkrim a, a taima a, inkhelh zawh apiangin player-te hi a mal malin kan tihsual leh inzirna tur min hrilh peih a ni," a ti a, Liverpool F.C leh Brighton & Hove Albion thlenga hna lo thawk tawh chu a dah sang hle. 

Aizawl FC aṭanga a career ṭantu Chhara chuan, "Vanneihnain kan lam a ṭang bawk a, kan khelh ṭhat vak loh ṭum pawhin goal kan khung leh mial zel a, beiseina chu kan tisang ve phawt a ni," tiin an hma hun a thlirlawk. 

Zirtawpni zanah Chennaiyin FC leh Bengaluru FC-te an inkhel a, Bangalore club-in 1-0 in hnehna an chang. Edwin Vanspaul chu Bengaluru forward Cleiton Silva lakah a foul a, penalty a chawi. 

Penalty hi Sunil Chhetri chuan goal-ah a chantir a, goal dang a lut tawh lo. Chennaiyin tan  Lallianzuala Chhangte leh Jerry Lalrinzuala ten inkhel bul an ṭan a, Lianzuala'n Fatkhullo Fatkhuloev tan duhthusama ball ṭha a siamsak chu Tajikistan international hian goal-ah a chantir thei lo. 

Zanin dar 7:30-ah ISL inkhel pakhat a awm dawn a, defender Laldinliana Renthlei, Ricky Lallawmawma, midfielder Isaac Vanmalsawma leh striker William Lalnunfela-te khelhna Jamshedpur FC leh ATK Mohun Bagan an inkhel ang.