Bayern an chak awlsam

Bayern Munich-in Pathianni zan khan FC Cologne 4-1 in an sawp a, match 22 khelh zawhah point 46 hmuin Bundesliga hmahruaitu an ni. RheinEnergieStadion-ah Bavarians tan Robert Lewandowski (3'), Kingsley Coman (5') ten goal hnih an khung hnuah Serge Gnabry-a'n minute 12 leh 66-naah a khung belh a, Mark Uth hmangin Cologne-in minute 70-naah siphurh an sut ṭhen.

Bavarians-in bul anṭan ṭha a, Germany coach Joachim Low hnawl tawh Thomas Muller a la ṭha reng. Muller-a ball pek chu Lewandowski-a'n kawh zetin hmahruai nan a khung a, Polish striker hian tun season-a goal 23 a khungna a ni. Bayern game a mawi zui a, minute hnih hnuah Lewandowski, Muller leh Kingsley Coman ten ball inpe kualin France international Coman-a'n a hmawr a bawk.

Minute 12-naah Serge Gnabry-a'n goal thumna a khung a, first half-ah Bayern-in inkhel an thunun. Bavarians tan Joshua Kimmich leh Thiago Alcantara ten chance ṭha an bawhpelh a, Gnabry leh Kimmich ten woodwork an tih per. Halftime-ah Markus Gisdol-a'n a naute a fuih ṭha a, second half-ah Cologne an ṭha sawt.

Cologne tana Jhon Cordoba goal khung chu VAR hmanga ennawn a nih hnuah pawm a ni lo a, Colombian striker Cordoba hian goal dang khung thoah inngai hman mah se offside vangin goal-ah chhiar theih a ni lo. Bayern keeper Manuel Neuer pawhin Mark Uth-a khung tur ṭha takin a dansak.

Gnabry-a'n Bayern hmun himah dahin minute 66-naah Alphonso Davies thawhrah chu goal-ah a chantir a, mikhual team hian inkhel thunun erawh an harsat. Cologne tan Uth-a'n minute 70-naah a khung a, Manuel Neuer a chetṭhat avangin goal dang erawh an khung tawh lo. Germany international keeper Neuer hian Anthony Modeste-a goal khung tur ṭum hnih a dang.

Hans-Dieter Flick hote hian February 22, Inrinni zan hian Paderborn an mikhual ang a, February 25 zanah UEFA Champions League Last 16 khel turin Stamford Bridge-ah Chelsea an tlawh ang.