Pep-a Man City an thiam

Pep Guardiola kaih-hruai team inkhel a hmuhnawm ṭhin. Man-chester City pawhin Spanish manager enkawlna hnuaiah foot-ball mawina pholang chungin Fulham 2-0 in an hneh - City hi Premier League champion tura rinkai an ni.

Etihad Stadium a inkhelah Kevin de Bruyne chu roreltu a ni a, minute ngana lekah Raheem Sterling khung tur a siamsak. Belgium international midfielder hian minute 26-naah Sterling penalty hlawh chhuah chu an goal hnih nan a khung bawk.

Man City hian hliam vangin player chhawr theih loh an nei fo, season kal laiah pawh striker rinrawl Sergio Aguero a la inkhel mumal lo. Beisei loh result nei zauh ṭhin mah se Pep-a naute hi an khelh fuh ni chuan team dang chunga leng an ni.

Khelh hmabak pahnih nei chungin Champions League last 16 an lut thei a, Premier League match hnuhnung zawkah Burnley 5-0 in an sawp. Cottagers lakah inkhel hmuhnawm chhawp chhuak chunga chakin, an hmabak Manchester United tan pawh mikhual an chakawm lo ang.

Guardiola chuan, "Man City ka enkawl tirh season khan Chelsea chu league thununtu an ni a, a hnu lamah chuan keini leh Liverpool kan inel. Kuminah chuan beisei loh leh rin loh tak tak a thleng fo.

"Kan khelmualah Lei-cester City chuan goal nga an khung thei a, Foxes hian Fulham an ngam lo ve leh thung si. Premier League-ah chuan team zawng zawng hi inhnehtawn thei vek kan ni tih a lang chiang hle," a ti.

A naute khelh dana a lawm thu sawi zuiin Pep chuan, "Harsatna hrang hrang vangin season tir lamah kha chuan kan buai ngei mai, tun hnaiah erawh match li chhung goal chhuah loin kan kaltluang ta," tiin a sawi.

Kum 49 mi Guardiola hian manager a nih hnuah a team te match 700 a enkawl tling ta chiah. City hma hian Barcelona leh Bayern Munich a enkawl tawh a, season 11 chhungin major title 29 ngawt a chawi tawh.