Mipa boxer paliin final lut

North East Zone Elite Boxing Championship 2019 chu Chirang, Assam-ah khelh mek niin Mizo mipa boxer paliin final an lut. Vawiin hian a tawp kharna neih a ni dawn.

Inelna hi January 3 aṭanga ṭan a ni a; Lalnunzira (60 Kg), Zomuansanga (64 Kg), Zochhuanawma Fanai (69 Kg) leh Vanlalawmpuia (75 Kg) ten final an lut. Boxer dang pahnih F. Zoramchhana (56 Kg) leh Hmingthanmawia (49 Kg) te semifinal-ah chak loin bronze an la a, Joseph Lalremruata (52 Kg) erawh quarterfinal-ah a chak lo.

Siaha tlangval Lalnunzira hian final lut turin semifinal-ah Kordor Marwein (Meghalaya) chu unanimous decision-in a hneh. Khatla South tlangval Zomuansanga hian quarterfinal-a Mudang Takar (AP) a hneh hnuin nimin khan Bone Nazary (AS) a hneh leh bawk.

Republic Veng tlangval Zochhuanawma Fanai hian L. Kima (Nagaland) leh Kh Sanamacha Singh (Manipur) te hnehin final an lut. Khuangthing tlangval Vanlalawmpuia'n Erick Khongsit (Meghalaya) leh Th Iboyaima Singh (Manipur) te chu knockout ve vein a hneh a, vawiin hian final khelh a ni ang. Mizo mipa boxer-te hi Sete Boxing Academy-a awm vek an ni.

Nizan khan women's semifinal-ah hmeichhe pathum TC Lalremruati (ITI Veng),  Vanlalhriatpuii (Champhai) leh Abisak Vanlalmawii (Mission Vengthlang) te an inlan a, result kan hre hman lo.

Mizoram team coach hi Albert Sangzuala a ni a, manager hi T. Lalthlengliana a ni.