Inter hnehtu Lazio-in Juve an hnaih

Serie A nomawi inchuh boruak a sang chho zel. Champion lai Juventus chu Lazio leh Inter Milan ten an chhaih buai hneh hle, Italian club lian pathum hi match khat chauh chetsual lekah an dinhmun a inthlak danglam vek thei.

Pathianni zan khan hmahruaitu Juventus chuan Brescia 2-0 a hnehin a chung berah an awm. Inter Milan-in Turin club hi a chung ber aṭanga nekchhuah theihna hun nei mah se Antonio Conte naute hi Lazio lakah 2-1 a tlawmin pathumnaah an awm ta zawk.

Season duhawm hmang mektu Lazio chuan goal an chhuah hmasak hnuah Inter Milan an hneh thei. Mikhual Inter tan Ashley Young chuan chawlhlawk hma chiahin Italian club a zawm hnua a goal hmasa ber tur a volley lut.

Mahse, Serie A top scorer nilai Ciro Immobile chuan minute 50-naah ama penalty hlawhchhuah khungin an si phurh a sut, Italian forward hian season kal laiah league goal 25 a khung der tawh. Minute 69-ah Sergej Milinkovic-Savic chuan yard 14-a hla aṭangin chakna goal a khung bawk.

Inter hian hun tawp dawnah an siphurh sutah an inngai, wing back Young-a cross chu Lautaro Martinez-a'n lo tauh lut mah se Argentine striker hi offside avangin a goal pawmsak a ni lo, season kal laiah Conte naute a vawi hnih nan an tlawm.

Hnehna changtu Lazio-in point 56 hmuin Inter Milan an tlanpel a, hmahruaitu Juve an phak lohna chu point khat chauh a ni ta. 1974 leh 2000 Serie A title latu hian coach Simone Inzaghi kaihhruaina hnuaiah a vawi thum nan Italian champion nih leh an beisei mek.

Juventus chuan Paulo Dybala leh Juan Cuadrado te goal hmangin Brescia 2-0 in an hneh, a zawna season riat chhung nomawi an chawi tawh chu humhim leh ngei turin kawng dik an zawh zel.

Mikhual Brescia forward Florian Aye-a'n Juve midfielder Aaron Ramsey laka a foul avangin a yellow card pahnihna a hmu a, hnawhchhuah a ni. Cristiano Ronaldo tel loa khel Old Lady hian minute 50 chuang tam zawk ni chungin khel mah se goal an khung hnem thei lo.

Hnehna an chan vangin Juve an lawm a, lawmna tizual turin captain Giorgio Chiellini a inkhel thei leh tawh bawk. Kum 35 mi defender hi season ṭan ni khan a inhliam a, thla ruk chuang a chawlh hnuah a inkhel leh thei chauh - hun tawp dawnah Leonardo Bonucci a rawn thlak.

Juve captain Chiellini chuan, "Hun thim chu a kiang ta, zawimuangin ka ṭha chho zel. Inkhelh leh theihna hun min siamsaktu coach leh teammate chungah ka lawm, tuna ka beisei san theih chu team tana mi pawimawh nih leh phak a ni," tiin a sawi.