Bielsa 'Leeds' aiin Lampard 'Chelsea' an thiam

Chelsea-in Premier League hmahruaitu ni turin Inrinni zan khan Leeds United 3-1 in an hneh. Frank Lampard-a'n Championship-a a elpui ṭhin Marcelo Bielsa aiin player a nei ṭha zawk a, Stamford Bridge-a inkhelah pawh hian chak an phu zawk.

Mipui 2000 hmaah mikhual Leeds-in Patrick Bamford hmangin hma an hruai a, Chelsea-in Olivier Giroud, Kurt Zouma leh Christian Pulisic te goal hmangin an lehthal.

Chelsea-in inkhel nung tak an lantir nghal a, Leeds an nawr tawm nghal. Amaherawhchu minute linaah Kalvin Phillips-a ball ṭha zet chu Bamford-a'n amah duh lotute lamah a khung a, 1-0 a ni.

Blues an hmuhnawm zui a, mak takin goalline bul aṭangin Timo Werner-a'n a hlah. Lampard-a'n season ṭantirh lama a rin loh Giroud chu Champions League hattrick a siam hnuah bul a ṭantir a, a tifuh hle.

French striker Giroud hian minute 27-naah Reece James cross chu goal-ah a chantir a, striker ṭha bik a nihzia a pholang zel. Second half-ah Mason Mount-a corner pet chu Kurt Zouma-a'n a tauh lut a, minute 61-naah 2-1 a ni.

Injury time-ah chak nem-ngheh nan Werner-a siamsak chu substitute Pulisic-a'n a ti goal. Chelsea-in goal khung tamin ball chang tam mah se Leeds-in goal chance an insiam hnem zawk a, inkhel a hmuhnawm hle.

Chelsea manager Frank Lampard chuan, "Leeds nen a nih tawh chuan goal kan khung tam loh chuan a tawp thlengin kan buai thei tih ka hre sa. Khelh dan nghet tak an nei a, team ṭha tak lakah point thum kan hmu a. Kan khelh dan leh kan rilru put hmangah ka lawm," tiin a sawi.

English manager Lampard chuan, "Minute nga chhung lek hmahruaitu nih hian kan rilru a la peng tur a ni lo," tiin a sawi a, nizana North London Derby inkhel result a zirin pahnihnaah an awm lehnghal thei tih a hrechiang hle.

Leeds boss Marcelo Bielsa chuan, "Tlarhnung aṭangin defence lai leh N'Golo Kante hoin ball an rawn in pass chhuak a, kan tan chuan a harsa a ni. Referee thutluknaah sawisel tur ka hre lo a, chak loh hi kan tan inzirna tur a ni," tiin a sawi.

Chelsea hian vawi riat chiah goal attempt an neih laiin Leeds hian vawi 23 shot an nei thei a, Championship champion hi Premier League team lian tan pawh khelh an harsa tih chu a chiang a ni.