Calvert-Lewin goal a tawk lo

Premier League season kal laia goal khung hnem ber ni lai Dominic Calvert-Lewin goal khung chu Everton chak nan a tawk zo lo a, khualmualah Burnley nen 1-1 in an inhnehtawk.

Manchester City laka mualpho hlim Burnley lamin minute thumna lekah Robbie Brady hmangin an khung a, chawlhlawk hman hma chiahin Calvert-Lewin-a'n a sut. English striker hian  tun season Premier League-ah goal 11 a khung tawh a, Spurs forward Son Heung-min aiin goal hnihin a khung tam.

Team pahnih in point thum hmuh an tum a, chak turin hun ṭha pawh an insiam. Mahse England tana si ban nghaktu nih inchuh Jordan Pickford leh Nick Pope te an chesual duh lo, entu zingah Gareth Southgate a awm avangin chesual lo nih a pawimawh.

Everton boss Carlo Ancelotti chuan, "Gareth Southgate tan goalkeeper ṭha tak pahnih neih hi lawmna tur a ni ang. Jordan a khel ṭha a, kan lama lut tur vawi thum chu ṭha takin a dang. Pope hnathawh pawh sawi hmaih theih a ni bik lo ang," a ti.

Burnley hian an match lehpekah Arsenal hmachhawn turin Emirates Stadium an tlawh dawn, Everton pawhin tunlaia khel hmuhnawm thei tak Chelsea an mikhual dawn avangin team pahnih hmabak a hautak hle.