Rammawia'n Electric Veng a chhi êng

Mizoram Premier League Season 8-ah semifinal khel tur chu league match hnuhnung ber khelh zawhah chauh a hriat dawn. Nimin khan Electric Veng FC-in Lalrammawia goal hnih hmangin Chhinga Veng FC 3-1 in an hneh a, Lalsangzuala Hmar hote hian match hnuhnung bera FC Venghnuai an hneh chuan semifinal an lut ang.

Vawiin tlai dar 4:00 hian Chanmari FC leh Aizawl FC an inkhel dawn a, hei pawh hi semifinal khel tur zawnna tho niin 'quarterfinal' ang hiala chhal theih a ni.

Electric Vengin nimin tlai inkhelah Lalrammawia ball tauh luh ṭha zetin hmangin minute 7-na lekah hma an hruai a, Chhinga Vengin MC Malsawmzuala tauh luh hmang bawkin minute 29-naah an sut.

EFC hian I Day Football an champion ṭuma an player hming langsar Lalruatfela Zote an chhawr leh tawh a, Republic Vengthlang tlangval hi inhliam vangin first half-ah an thlak. Fela Zote thlaktu Jacob Lalrawngbawla'n hmahruaina goal minute 60-naah a rawn khung a, Rammawia'n 'cool' takin chak nemnghehna minute 69-naah khungin 3-1 in inkhel a tawp.

Chhinga Veng hi chak lo mah se semifinal khel tlak an ni tih pholangin chance ṭha an insiam nual a, EFC keeper Lalmuansanga'n ṭha zetin Vanlalzuidika goal khung tur a dansak a, MC-a'n goal ban a pet per bawk.

Chanmari FC-in league hmahruaitu nichiang tawh Aizawl FC an hmachhawn dawn a, I League club coach Standly Rosario chuan, "I League kan khelh dawn avangin inhliam kan hlau a, player chhawr rim ṭhenkhat hi chu kan chawlhtir dawn. Chutihrualin player naupang zawk tan hun ṭha a ni dawn a, chak tumin kan khel dawn," tiin an inthlahdah loh tur thu a sawi.

AFC khingpui tur Chanmari hian match hnuhnung pathumah chak hmel an hmu tawh lo a, tun ṭumah hian chak an mamawh takzet. Chanmari manager Lalhmangaiha Sailo chuan, "Chak ngei ngei a ngai a, chumi tur chuan kan khel ang. Aizawl FC nen hian tun season-ah vawi hnih kan inkhel tawh a, kan record a ṭha zawk a, league hmahruaitu ni mah se kan ṭha zawkin ka hria," tiin a inringtawk hle.

Chhingcows hian round 14-a an  match tur khel lawk tawhin Aizawl FC an hneh lo a, tunah chuan inkhel dang result-ah an innghat tawh. Vawiin tlai dar 4:00 hian Aizawl FC-in Chanmari FC an hmachhawn dawn a, 

I League club hi an chak chuan Chhinga Vengin hun rei nghah ngai loin nomawi laklet tumin an inpuahchah thei nghal ang.

Chutihrualin Chanmari FC-in Standly Rosario hote hi an hneh a nih pawhin match khelh tur nei tawh lo Chhingcows tan kawng a la inhawng tho. CFC leh EFC hian round 14-ah Ramhlun North leh Venghnuai an la hmachhawn dawn a, tu emaw zawk hian point an hloh chuan Chhinga Vengin knockout stage an lut ang.