Mizoramah Santosh Trophy final round

India ram state-te tana football inelna sang ber Santosh Trophy chu Mizoramin nakkum hian a vawi khat nan a thleng dawn. Inelna neih hun hi January, 2020-ah khelh ṭan tura tih ni mah se a hun hi Khelo India nen a inrual avangin sawn hlat a ni a, a ṭan hun tur puan a la ni lo.

Mizoram hian kum 2014 khan a vawi khat nan Santosh Trophy qualifying round - North East Zone an thleng a, hemi kum hian final round hi Siliguri-ah khelh niin Mizoram an champion. Final round khel tur team 10 a chiang tawh a, group A-ah champion lai Services, Kerala, Delhi, Meghalaya leh Jharkhand an awm. Mizoram hi group B-ah Punjab, Goa, Karnataka leh West Bengal te nen an awm thung.

Mizoram Football Association chuan, "Santosh Trophy atan inbuatsaihna ṭan chhoh a ni dawn a, hemi atan hian sorkar hotute kawng engkimah biak rawn a ni ang. Hlawhtling taka inelna kan thlen theih nan Mizo mipuite ṭawiawmna kan ngen," tiin thuchhuah an siam a, AIFF duhsakna dawnga Santosh Trophy final round meuh an thleng chu lawmawm an tih thu an tarlang bawk.