Mavericks lakah GSW an zawr

Nimin zing NBA regular season inkhelah Golden State Warriors an mualpho. GSW hi Dallas Mavericks lakah 142-94 in an chak lo a, kum 1973 hnu lama an chak loh chian ber ṭum an tawng.

Tun hnaia che ṭha thei tak Luka Doncic chu Mavericks tan a hmuhnawm leh a, kum 20 mi Solvenian tlangval hian point 35 ngawt nei lehin a team a chakpui. Warriors hian match khata player ziah luh tlem theih ber pariat chauh chhawp chhuakin an tlawm chiang hle.

Warriors coach Steve Kerr chuan, "Hetiang game chhinchhiah tlak loh aṭang hi chuan thil ṭha zir chhuah tur a awm lo, bawlhhlawh bawma daha paih bo daih tlak a ni," a ti. Golden State hi tun season match 13 an khelh tawhah vawi khat chiah an la chak.

Hliam vangin Warriors hi an buai a, tun hnai season nga chhungin NBA final lut vek mah se kuminah erawh Western Conference table mawngphah luah lumtu an ni. Tunah chuan kum 46 liam ta a point 56 zeta Dallas an ngam lohna ang maia chiangin an tlawm leh ta a ni.

Inkhel dangah Kawhi Leonard chu a hliam dam hnuah a rawn kir leh tawh a, Leonard leh Paul George ten point 42 sual chhuakin Los Angeles Clippers chu Boston Celtics lakah 107-104 in hnehna an chanpui. Giannis Antetokounmpo-a point 33 leh rebound vawi 11 lak hmangin Milwaukee Bucks chuan Atlanta Hawks 135-127 in an hneh a, tun hnaiah a zawnin match nga hnehna an chang a, match hnuhnung 10 aṭangin vawi kua ngawt hnehna an chang.

Houston Rockets chuan a zawna an vawi riat chakna ni turin Denver Nuggets 105-95 in an hneh. Nikola Jokic chuan tun season chhunga a chet ṭhat ber ṭum tawngin point 27 a nei a, player ṭha James Harden-a'n point 27 a nei bawk.