Quarterfinal-ah Nadal awmna Spain an lut

Davis Cup Finals khelh laiah inelna thlengtu Spain chuan Croatia hnehin quarterfinal an inhlangkai, world number 1 Rafael Nadal chuan an ram tan singles match vawi hnih a khelh tawhah hnehna a chang ve ve a ni.

Nilaini zan inkhelah champion lai Croatia hian Marin Cilic an chhawr theih loh an tuar zel. Doubles specialist Nikola Mektic chu singles huangah a inlan a ngai a, ani hi Roberto Bautista Agut lakah 6-1, 6-3 in a chak lo. Match hnihnaah Nadal inlanin a chungnung hle, Grand Slam vawi 19 champion tawh hian Borna Gojo 6-4, 6-3 in a sawp. Spain hian an match hmasa zawkah hnehna an chan tawh bawk avangin an tlang. Croatia erawh an chak loh zawn avangin group stage an paltlang dawn ta lo.

Madrid khawpuia inkhel dangah 2010 Davis Cup champion Serbia chuan Japan lakah 3-0 a hnehna changin Group A hmahruaitu an ni a, Filip Krajinovic leh Novak Djokovic ten singles huangah hnehna an chang - Janko Tipsarevic leh Viktor Troicki te chuan singles bikah hnehna an chang bawk.

Great Britain tan Andy leh Jamie Murray ten an thawh hlawk hle. Andy Murray-a’n harsa takin Tallon Griekspoor chu 6-7(7), 6-4, 7-6 (5) in a hneh a, doubles lamah Jamie ten hnehna chang bawkin Netherlands 2-1 in an hneh.

Kumin aṭangin Davis Cup khelh dan phung tih danglam a ni a, ram 18 inlan chu group parukah ṭhenhran niin an inkhel kual vek. Group tina a sang ber zelin quarterfinal an lut a, pahnihna ni zinga a ti ṭha pahnih chu a thiam pariat zingah an tel bawk.

Inelna thlengtu Spain bakah hian - Russia, Australia leh Canada ten quarterfinal hi an lut tawh, inelna hi November 24, Pathianni hian a hmawr bawkna neih tur a ni ang.