Beiseina leh hlimna tiamtu 'The Special One'

Mauricio Pochettino ban a nih hnua Tottenham Hotspur manager tura lakluh Jose Mourinho chuan London club-ah beiseina leh hlimna thlen leh a tiam. 

The Special One tia hminglem inpe ngat Jose chuan, "Ka phur takzet a, he team tan hian beiseina sang tak ka nei. He club tan hian ka theihna zawng zawng ka hlan dawn a, hlimna ka thlen leh ang tih ka tiam a ni," a ti. 

Mourinho tan December 2018-a Manchester United-in an ban hnua a hna hmasa ber a ni dawn a, Premier League-a 14-na ni mek club hi top four-a hlankai chu Spurs thuneitu leh ṭantute beiseina tur a ni ang. 

Portuguese manager chuan sawi zawmin, "Cup final, semifinal leh game langsar tak takah kan lo intawng tawh a, khatihlai zawng khan he club hi zah takin ka thlir ṭhin. Engtikniah emaw chuan ka la enkawl che u rinna ka neih vang a ni," a ti. 

Khawthlang media ten an tarlan dan chuan Mourinho hian January transfer bazar-ah sum hman tur a nei dawn lo a, Spurs thuneitute chuan squad neihsa hmanga top four nih tum turin an hrilh. He thu hre sa hian Mourinho-a'n London club a zawm a, a squad neih chu a fak. Chelsea boss hlui chuan, "Manager tan chuan club zawm a, squad neihsaa lungawi em em mai chu inchhuanna tham a tling a ni. 

"Zep lohah chuan kan kalna tam zawkah hian squad neihsaah kan lawm ngai lo a, thlak danglam dan kan ngaihtuah ṭhin. Tun ṭum erawh a danglam a, he squad hi ka duh takzet," a ti a, academy player chhawr a tum thu a sawi tel. 

Hei hi khawvelin hmuh leh a châk Mourinho chu a ni - Porto-ah squad ropui tak nei loin Champions League nomawi a chawi a, a hnuah erawh sum tam tak a nei zel. 'The new Porto' tiin Spurs kan ko thei dawn em? Hunin 

a hril ang. 

Spurs-in pound tluklehdingawn khat man hu stadium an nei a, Mourinho chuan, "Stadium nalh tak a ni tia sawi ngawt tur a ni lo a, khawvela a ṭha ber a ni. Training ground en ila, hmun dangin a tluk lo. "American football training ground te nen chuan a khaikhin theih mai theih a, mahse European football bikah chuan hmun hrang hrangah ka kal tawh a,  hetianga training ground ṭha hi ka la hre lo," a ti - Barcelona, Porto, Chelsea, Real Madrid leh Man United-ah hna a thawk tawh tih hriat a ṭha. 

Mourinho hian 2022-23 thleng cham turin Spurs-ah contract a ziak a, khawthlang media te chuan pound maktaduai 15 vel a hlawh dawn niin an sawi - mahse a basic erawh pound maktaduai riat vel a ni ang a, a bak hi bonus aṭanga dawn tur a ni ang. 

Kum 56 mi manager hi Lille coach pahnih Joao Sacramento leh Nuno Santos ten assistant ni turin an zui a, Sacramento hi releagtion battle aṭanga Champions League khel tura Lille hruai thleng tura hnathawktu pawimawh a ni a, Nuno hi Leeds United keeper hlui niin goalkeeping coach a ni dawn.