Chennaiyin tan semifinal beiseina! Boss Owen Coyle-a'nMizo defender-te a fak

Bolton Wanderers boss hlui Owen Coyle-a'n Chennaiyin a enkawl tirh khan top four beisei ngam a ni lo - mahse league round tawp a hnaih meuh chuan South Indian club hian semifinal khelh an sawi ri leh ta.

Chennaiyin lama Mizo player-te an khel ṭha a, inkhelh banah an coach pawhin a fak hle.Pathianni zan khan Chennaiyin hian an mikhualna ramah ATK chu 3-1 in an hneh a, palina Mumbai City an ngam lohna chu point khat chauh a ni tawh - match hnih khelh tur an la nei a, Mumbai club hian match khat chiah an nei tawh thung.

Chennaiyin tan Rafael Crivellaro chuan minute sarihna lekah goal hmahruai a khung a, Andre Schembri chuan chhunzawmin 2-0 a ni. Mahse, ATK an beidawng lo, ISL-a striker hmuhnawm ber pawl Roy Krishna chuan si phurh a rawn sut ṭhen a, beiseina an nei thar.

Mahse, Chennaiyin hian Nerijus Valskis an nei ve tho. Lithuania international hian hun pek belhah goal a rawn khung ve leh a, an chakna a nemnghet - tun season-ah match 16 khelin goal 13 a khung tawh a, assist vawi li a nei. 

Chennaiyin tan Laldinliana Renthlei, Jerry Lalrinzuala leh Lallianzuala Chhangte te chuan inkhel bul an ṭan a, Jerry hi Emerging Player of the Match atan thlan a ni. 

Owen Coyle chuan, "Jerry a khel ṭha takzet. Tlarhnungah a ṭha a ni mai lo a, ball nen a talbuai lo. Jerry leh Dinliana te hi kan chakna hnar an ni a, ATK an dang chat nasa hle. Kan team tan mai pawh ni lo, national team tan pawh hei hi a ṭha a ni," tiin a sawi. 

Bethlehem Veng rawlthar Jerry hi chu India tana khel fo tawh a ni a, a kum rualpuia hriat hlawh ber zinga mi a ni. Armed Veng south tlangval, MPL 6-a Best Defender Dinliana hi tun season chawhnu lama khel ṭha chho a ni.

Chennaiyin-a Mizo player langsar Jeje Lalpekhlua erawh inhliam vangin a la inlan thei lo chhunzawm zel.

Zaninah ISL inkhel a awm dawn lo a, Nilaini zanah Jamshedpur chuan FC Goa an mikhual ang.