Engvangin nge Liverpool an talbuai?

Season hmasa lawkah hneh taka Premier League thunun chungin an champion a, tun season-ah erawh Liverpool an talbuai takzet - Jurgen Klopp-a naute hi eng vanga talbuai nge an nih? tih zawhna a awm a, football lama mithiamten a chhanna an inrinsiak. 

Reds talbuaina langsar tak chu goal khung an harsat hi a ni - season hmasa khan league match 18 hnuah goal 46 ngawt an khung a, tun season-ah erawh goal 37 chiah an khung thung. Crystal Palace 7-0 ngawta an sawp khan an goal khung a ti tam mah mah!

Reds hian Palace an sawp hnuah khan league match li chhung chu goal khat chiah an khung a, Anfield-a Manchester United 0-0 a an inhnehtawkpui khan Rafael Benitez enkawlna hnuaia kum 2005-a (February - March) league match thum goal an khung loh hnua league-a goal an khung loh zawn rei ber record an siam bawk. 

Jurgen Klopp meuh pawhin,"A hrilhfiah dan tur ka hre lo a ni," tiin an goal khung theih loh chhan a sawifiah thei lo a, zanin dar 1:30-ah league match khel turin Burnley an mikhual dawn - khung tawh tak ang maw?

"Liverpool goal khung harsat chhan chu tlarhnung inhliam vang," tiin sawi ila, tam tak nuih a za ang - mahse, a ni miau si! October khan defender chhuanvawr Virgil van Dijk chu Everton nen an inkhelah a inhliam a, VVD inhliam hian Reds tlarhnung a nghawng dawn tih chu thil chiangsa a ni. 

Mahse, VVD-a inhliam hian engtin nge Liverpool tlarhma a nghawng tel theih? VVD bakah Joe Gomez a inhliam tel a, Joel Matip-a'n buaina a nei reng bawk. An defender ṭha ber tel loin Reds tlarhnung an tawlh hnung lehzual a, tlarhnungah nghet takin VVD-a awm tih rinna leh Gomez-a chet ranna tel lo chuan 'high defensive line' an hmang ngam lo. 

Tlarhnung inhliam vangin midfield-a an khingpui goal khung tur chhu chat ṭhin Fabinho leh Jordan Henderson-te tlarhnungah an pawh let a ngai fo a, hei ringawt pawh hi buaina a tling. 

VVD inhliam hma khan Reds hian league match liah goal 11 an khung a, match khata goal 2.75 khung zel ang an ni - Dutch defender a inhliam a, league match 14-ah goal 26 chauh an khung zui. Reds hi league match khata goal 1.86 zel chauh khung ang an ni ta!

Liverpool-in pound maktaduai 45 thlenga sang chho thei tura Diogo Jota an lei khan an player neih dan enin squad player tur bakah ngaih a ni lo a, mi tam takin a to uchuak an ti - tunah erawh Jota manto lohzia kan hre tawh. 

Jota hian insiamrem hun mamawh mah se rei lo teah goal khung hna a thawk zui a, December 9-a FC Midtjylland laka a inhliam hma khan match 17-ah goal kua a khung hman. 

Mohamed Salah, Roberto Firmino leh Sadio Mane 'form' loh lai pawhin an hmun awl luah zo tur Reds-in an neih loh phah a,  Divock Origi leh Takumi Minamino-te lah eng ual an ni lo. 

Jota tel loin Reds-in league match sarihah vawi hnih chiah hnehna an chang thei a, an mangchhia ata ṭhanharh tumin zaninah an khel ang. 

Klopp-a'n central midfielder pariat a nei a, tun season Premier League-ah an inlan vek tawh chungin an vaia assist neih zat belhkhawm chu pathum a ni!

Jordan Henderson, James Milner leh Alex Oxlade-Chamberlain-ten assist vawi khat ṭheuh an nei tawh a, Georginio Wijnaldum, Naby Keita, Thiago Alcantara, Curtis Jones leh Fabinho-ten assist an la nei lo thung. Attacking midfielder Xherdan Shaqiri-a'n vawi khat assist a nei tawh bawk. 

Hetihrual hian Fabinho-a'n tun season chu centre back lamah hun a hmang tam zawk a, Chamberlain leh Shaqiri-te an inhliam deuh reng bawk - Liverpool tlarhma ten chawmtu an nei ṭha tawk lo a, ball an hmuh ṭhat loh miau avangin goal khung a harsa. 

Liverpool buai tizualtu chu an midfield zinga thiam bera chhal ngam Thiago Alcantara inhliam a ni a, Bayern Munich midfielder hlui hian a theihna tak tak pho chhuak turin hun a la nei lo - Spanish playmaker hian ngai a awh chhoh chuan Liverpool game a danglam thei ang. 

Liverpool-in goal an khung loh chhana puh tur lian ber chu tlarhma an ni a, Liverpool game tifamkim tura Firmino thiamna hi hmuh hmaih rual ni lo mah se Salah leh Mane-ten goal khung an harsat laia goal khung turin Reds hian number 9 'tak tak' striker an mamawh niin a lang. 

Tun hnai season li chhungin Reds tlarhma pathum hian goal 248 ngawt an thawk chhuak a, pui tham tak a ni - Champions League leh league nomawi hial an hlawhchhuah nan pawh an ṭangkai hle. Mahse, thil ṭha pawhin tawp hun a nei ṭhin a, Reds tlarhma hi siksawi a ngai tawh tihna a ni em?

Liverpool forward chhuanvawr Salah-a'n thla hmasa lawk khan Real Madrid leh Barcelona a ngaihsan thu a sawi a, Midtjylland an hmachhawn ṭuma a captain loh vanga a lawm loh thu a sawi tel bawk - hei vang hian fans ṭhenkhat chuan Anfield-ah a rilru a pe tawk tawh lo niin an ngai a, tun hnaia a chet chhiat chhanah an puh. 

Mahse, tuna hnaia goal a khung lo chunga Premier League top scorer (13 goals) ni mek Salah chuan, "Ka hma hun ka sawi thei lo a, mahse, Liverpool tan hian a rei thei ang ber khelh ka duh. Ka sawi tawh angin club kutah engkim a awm thung - he club-a ka awm chhung chu 100% ka pe dawn a, nomawi chawi zel ka duh a ni," tiin a insawifiah. 

Klopp-a'n Anfield-a pan hnuah team ṭha tak a din a, mahse, a player rin ngai a rin rei tak avangin an khelh dan hi an khingpui team ten an bel ve ta deuh niin a lang a, Klopp-a tan khelhdan phung thlak zeuh zeuh a ngai. 

Premier League club-ten Reds hian goal nawr turin fullback pahnih Andy Robertson leh Trent Alexander-Arnold an chhawr ṭangkai ṭhin tih an hre vek tawh a, season hmasaa belhkhawma assist 25 nei thei defender pahnih hian tun season-ah assist vawi sarih chiah an nei tawh. 

Hei mai a ni lo - midfield an creative tawk lo a, Van Dijk tel lo chuan tlarhnung an inringtawk lo tih hi an hmachhawn ṭhin team-ten an hre vek. Reds tan kawng thar zawn a ngai a ni.

Hetihrual hian Liverpool hi an chhe ta duai tihna erawh a ni lo a, season hmasa an phak lo tih chauh a ni. Klopp-a'n, "Tun hnaia an fak vul chuk United chu tun hnaia talbuai anga an sawi team-in kan mikhual a, kan inhnehtawkpui a ni," tia a sawi khan Reds dinhmun a hrilhfiah a, he team hi a chhe hluai ni loin mipui beisei an phak lo mai zawk chauh a ni - zaninah beiseina ti hlawhtling thei tak ang maw?