Arsenal hmachhawn tur Saints

Southampton chuan an mikhual Shrewsbury Town 2-0 a hnehin FA Cup third round an paltlang a, champion lai Arsenal nen Inrinni zanah fourth round an khel chhunzawm leh nghal ang.

Thawhlehni zan inkhelah mualneitu lamin inkhel an thunun hneh viau, forward Daniel N'Lundulu (16') leh midfielder James Ward-Prowse (89') te hmangin goal an khung a, mikhual League One club tan tih theih a awm lo.

A tira ruahman dan chuan team pahnih hi January 9 khan inkhel tur an ni. Mahse, coronavirus vangin Shrewsbury Town an buai a, inkhelh hun sawn a ngaih phah - Inrinni zana khelh zui a ngai dawn avangin Saints an hah deuh dawn tihna a ni.

Southampton manager Ralph Hasenhuttl-a'n a sawi lawk ang ngeiin senior player zingah naupang zawkte tan inkhelhna hun a siamsak, Caleb Watts (19 years), Kegs Chauke (18) ten a vawi khat nan senior match an khel; Yan Valery (21) leh Jake Vokins (20) an inlan bawk.

Premier League club hian an neih ṭhat ber thawh chhuah pui lo mah se an mamawh tawk goal an khung. Shrewsbury hi an manager Steve Cotterill-a'n hrileng kaihhnawihah team a la enkawl thei lo, assistant coach Aaron Wilbraham hoin an khel a ni.