Chhinga Vengin semifinal an lut

Mizoram Premier League semifinal khel tur pakhat a hriat belh a, nimin tlai inkhela Aizawl FC-in Chanmari FC an chelh zarah Chhinga Veng FC-in knockout stage an lut. 

Chanmarians erawh I League club laka point khat chauh an hlawhchhuah avangin semifinal lut turin an dinhmun a chhe ta hle. Lammual inkhel hmuhnawm takah Aizawl FC-in F. Lalremsanga hmangin minute khatna lekah hma an hruai a, Chanmari FC-in second half-a Lalremruata leh David Lalrinmuana goal hmangin an lehthal - semifinal an hnaih hman. Mahse minute 86-naah defender R. Lalawmpuia (Mapuia) handball vangin penalty an chawi a, Lengpui tlangval Remsanga'n AFC si phurh sut nan a hmang a, 2-2 in inkhel a tawp.

Chanmari FC-in chak an mamawh a, goal khung hmasa zawk erawh Aizawl FC an ni. Minute khatna lekah ding lam ṭanga William Lalnunfela cross chu Remsanga'n awlsam takin a khung nghal. Chanmari FC-in insiamrem an harsat a, goal chance siam an harsat. Heti hian inkhel tawp se semifinal khel tur a chiang nghal dawn a, Chhinga Veng leh Electric Veng ten knockout stage an lut dawn.

Second half-ah Zemabawk North tlangval David-a'n freekick a pet thiam zia a rawn pholang a, a freekick pet ṭha tak chu AFC keeper Lalawmpuia'n ṭha zetin a dang. I League club-in freekick chawi an sim phah lo a, David-a'n a pet ṭha tulh tulh.

Chanmari FC midfielder David hian minute 59-naah hla tak aṭanga a freekick pet chu keeper Lalawmpuia'n hnek chhuak fuh tawk loin ball per changtu Lalremruata'n mawi zetin a pet goal - AFC defender-te dem theih a ni lo.

Minute 66-naah David-a'n freekick chuh leh chatin a ball pet ṭha zet chu Aizawl FC keeper AwP-a'n a en liam. Heti hian inkhel tawp ta se Chanmari FC-in semifinal an hnaih sawt a, an match hnuhnung bera Ramhlun North an hneh chuan semifinal an khel dawn chiang.

Aizawl FC-in si phurh an sut a rinawm tawh lo a, amaherawhchu Chanmari vanduai hun a thleng ve ta thung. Minute 86-naah tawnhriat nei ṭha Mapuia'n ṭul lo takin box chhungah a kut a hmang a, referee-in a hmuh chian avangin penalty spot a kawk. Lengpui tlangval Remsanga'n keeper T Mawia bumin 2-2 in inkhel a tawp.

Chanmari FC-in point hnih an hloh avangin club dang result-a innghat Chhinga Vengin semifinal an la lut a, hmun ruak pakhat la awm chu Chanmari leh Electric Veng ten an inchuh chhunzawm ang. Chanmari hian November 28, Ninganiah Ramhlun North an hmachhawn dawn a, an chak ngei a ṭul tawh. Chutih rualin CFC hian point thum pawh hmu se Electric Vengin November 29, Zirtawpni zana FC Venghnuai an draw chuan Chanmari an tla tho dawn - club dang result-ah an innghah a ṭul ta.

Chanmari FC manager Lalhmangaiha Sailo (Angaiha) chuan, "Semifinal lut turin midang result-ah kan innghat tawh a, chuti chung chuan theihtawp kan chhuah chhunzawm zel ang. Kan tum ram kan thleng ta lo a nih pawhin season tharah ṭha zawkin kan rawn kir ang," tiin inkhelh banah a sawi.

Aizawl FC coach Standly Rosario chuan, "I League kan thlir tel a ṭul tawh avangin kan player-te an inhliam loh nan  player naupang zawk ṭhenkhat khelhna hun kan pe a, an khelh danah kan lawm. November 30, Inrinni hian Mohun Bagan kan mikhual dawn a, Mizo mipuiten min ṭawiawm ngei ka beisei," tiin an match khelh hmabak I League a thlir tel nghal.

November 28, Ningani        

Ramhlun North    04:00 PM    Chanmari FC

November 29, Zirtawpni        

Chawnpui FC    04:00 PM    Mizoram Police

FC Venghnuai    07:00 PM    Electric Veng FC