A vawi nga nan Woods an zai

Golf khel thiam hmingthang Tiger Woods chu a vawi nga nan a hnungzâng na zai a ni a, tun season PGA Tour tir lamah a inlan theih a beisei awm loh - a chawlh chen tur erawh tih chian a la ni lo thung.

Kar leh hian Torrey Pines-ah Farmers Insurance Open khelh a ni dawn, vawi sarih a champion tawhna hmunah hian Woods a inlan thei lo ang. February 18-21 chhunga khelh tur Genesis Invitational pawh a khelh a rinawm loh a ni.

Kum 45 mi Woods chuan, "Inkhelh leh ngei ka la tum a, engtik niah emaw chuan natna nei loin ka la inkhel ve leh ngei ang tih ka chiang tlat a ni," tiin a sawi, chawlh mai a la tum lo hle.

American star hi 2017 April thla khan a vawi li nan zai a lo ni tawh, zaipui a tawh hnuah hian ṭha takin a inkhel leh thei. Mahse, a hnungzâng na a reh fel thei lo a, a natna vang hian a duh aia hmain golf a chawlhsan pawh a la ngai hial mai thei.