Atletico khelmualah champion lai Liverpool

Zanin dar 1:30-ah Champions League match hmuhnawm bik en tur a awm dawn a, champion lai Liverpool chuan Spanish club ṭha Atletico Madrid an lenchilh dawn.

Tun hnaia club pahnih dinhmun erawh a danglam hle thung. Atletico hi inelna hrang hranga an match hnuhnung pasarihah vawi khat chiah an chak a, Liverpool erawh Premier League-a point 25-a hma hruai faltu an ni thung. 

Mahse, Champions League round of 16 a nih miau avangin a boruak a danglam ang tih a chiang a, Jurgen Klopp pawh a ṭawng fimkhur hle. 

Liverpool coach chuan, "Hnehna chang tura khel thei team an awm a nih chuan Atletico hi an ni. Simeone hian a theihna zawng zawng a pe mai ṭhin," a ti a, an khingpui team a dah 

sang hle. 

Tun hnaia Madrid khaw club talbuaina chu player inhliam an ngah lutuk kha a ni a, mahse an player ṭhate Liverpool hmachhawn tura an dam hman hlawm avangin chanchin lawmawm an nei. 

February 1-a a inhliam hnuah Alvaro Morata chu inkhel turin a dam leh tawh a, Spanish striker hi Zirtawpni zana Valencia nen 2-2 a an inhnehtawk ṭumin bench aṭanga luhtir a ni. 

November-a a inhliam hnua khelmual la rap leh lo Diego Costa a dam tawh a, Spain international hi Morata nen an rawn inkawp a nih phawt chuan Reds tlarhnung tan buaipui tham an ni ang. 

He thu buatsaih lai hian Joao Felix inlan theih dawn leh dawn loh a la chiang lo a, Portuguese forward hi khelmuala a awm chuan danglamna thlen thei player a ni. 

Atletico khelmual Wanda Metropolitano Stadium hi Liverpool fans thinlungah thaireh theih tawh loh turin a awm tawh - season hmasaa Champions League nomawi an chawina hmun a ni tlat. 

Hlimna vawr tawp an lo chen tawhna hmun hi Liverpool-in mittui tlakna hmunah chantir an duh lo ang tih a chiang a, English club hi an fimkhur dawn. 

Jurgen Klopp-a'n a duh ang takin player a chhawr thei dawn a, inhliam ber Sadio Mane pawhin Norwich City lakah goal a rawn khung leh tawh avangin hlauhthawnna tur a awm lo. 

Klopp chuan, "Kan intawn hma an talbuai lai khan players inhliam an ngah em em a, tunah erawh an dam kim tawh," tiin tun hnai result hmanga Atletico theihna buk a duh lo a, a fimkhur.

Jurgen Klopp-a khelh dan style-ah rang taka ball inpek kual, ball hloh hnua neih let tuma tlan zung zung, na taka khingpui 'press' chu chakna hnar a ni a, German coach hian a naute khelh dan chu 'heavy metal' tiin a sawi. 

El Cholo tia hminglem an pek Diego Simeone-a'n a naute a khelhtir dan erawh Klopp-a 'style' nen a in ang lo a, 'tiki-taka' zul zui, mahse tlarhnung lam ngaih pawimawh bera nei siin a khelhtir ṭhin - chu chu 'cholismo ' tiin hminglem an pe. 

Cholismo hian innghahna lungphum pakhat a nei a, chu chu Simeone-a ṭawngkam, "Theihtawp chhuah turin inngen nawn a ngai tur a ni lo," tih a ni tawp a, engti zawng pawha theihtawp chhuah turin player-te chu beisei an nei. 

He khelh dan style-ah hian tawlhlet a ṭul hunah chuan player zawng zawng chu field chanve hnung lamah tlarhnung puiin an awm tur a ni a, rilru huaisen, tih tak takna leh thawh hona ṭha a pawimawh a, a 'lai' aṭang aiin a sir lam aṭanga ball kalpui chu thupui a ni. 

Klopp chuan, "Simeone nen hian in anna tak kan nei. Zinkawng hautak kan bei a, vawi tam kan tlawm fo. Mahse, kan beidawn phah ve lo - hei hi ka duh em em chu a ni," a ti. 

German coach ṭawngkam hian thui takin heavy metal leh cholismo kalphung a hrilhfiah a, manager pahnih nihna leh rilru puthmang hi an game kalphungin a putchhuah chu a ni. 

Coach pahnih enkawlna hnuaiah player-te an thawkrim a, an huaisen a, an beidawng ve ngai lo - chutiang player pahnih intawng tur chu khawvelin a hmu chak a, manager pahnihin ngaihven an hlawh lehzual. Klopp chuan, "Simeone nen hian kan innelin kan inhnaih hle. Mahse, game-a rilru zawng zawng pe ṭhin a nih avangin zaninah chuan inṭhiaṭhatna theihnghilh a ni ang," a ti - a hmuhnawm dawn!