Kulikawn hmaah Gorkha an ding dawn

Cricket Association of Mizoram hnuaia inelna ngaihhlut zinga mi President's Cup 2019 chu vawiin hian a hmawr bawkna neih a ni dawn. Chawhma dar 10:30 hian Kulikawn leh Gorkha ten Durtlang Khelmualah a thiam ber nih an 

inchuh ang.

Vawi li champion tawh leh record nei ṭha Kulikawn hi Mizorama batsman technique nei ṭha ber zinga mi C. Lalrinsanga hoa inlan tur an nih avangin rinkai an ni. Mahse, Gorkha lam hian player chhuak thar ṭha tak tak an neih avangin team ṭha lo zawka dah ngawt theih chu an ni bik lo.

Tun inelna neih laia player hmunawm bera chhal ngam chu Lalrinsanga hi a ni, Kulikawn thiampuipa hian match li a khelh tawhah ball 168 a hmachhawn aṭangin run 238 ngawt a vaw chhuak tawh, final-ah pawh an innghahna 

a ni leh dawn.

Inbuatsaihna nei ṭha Kulikawn tan Lalrinsanga bakah hian ball vaw na leh T20 atana player ṭha Vikash Kumar an nei. A vawm turin Hunthar tlangval spinner Moses Ramhlunmawia leh captain rintlak Michael Lalremkima an nei bawk - Chhinga Veng hneh thei an nihna chuan inrintawkna a pe sang zual ngei ang.

Tun hma deuhin Gorkha hian tualchhung cricket inelnaah nomawi vawi hnih an chawi tawh a, 2009 hnu lamah erawh hlawhtlinna an la chang leh lo. Kuminah hian an khel ṭha tluang hle. Final lut tur hian champion lai Bawngkawn South bakah Zemabawk Pitchers, VRCC leh Saron te an hneh a ni.

Gorkha hi an ball vawm vir thiam Vishnu leh rawlthar Sahil Sharma te awm lo mah se - man of the match atan vawi hnih tlan tawh Rajesh Kumar bakah Monirul Islam leh Sagar Sunar te an neih avangin team ṭha an ni.