Australian Open tih danglam tum lo

Covid-19 vangin Australian Open khelh hun sawn a ni a, inelna kalphung erawh tih danglam tumna a awm rih lo. Tournament chief Craig Tiley chuan kalphung pangngaia an kal tur thu a sawi.

Grand Slam hmasa ber hi February 8 aṭanga khelh tur ni mah se player inlan tur chu Melboure khawpuiah an thleng deuh vek tawh, inelna an hmachhawn hmain ni 14 chhung khunghran an ni ang.

Kum dang angin player an zalen lo, training nei thei mah se a khat tawkin hri kai an awm fo - mi tam tak chuan mipa inel nana set nga an khelh ṭhin chu set thuma tih tlem mai rawt tu pawh an awm nual.

Mahse, tournament chief Tiley chuan, "Grand Slam tournament a ni a, duhthusam veka thil tih theih ni lo mahse a theih chin chinah chuan dan pangngai zawm kan tum, mipui lamin inkhel hmuhnawm an en kha kan duh ber a ni," a ti.

Tournament khel tura zin lut tawh zingah player 72 ngawt chu an chenna hotel chhuahsan lo tura tih an awm mek, anni hi coronavirus kai an awm bakah hri kai nena inhnimhnaih vanga chhuak thei lote an ni hlawm.

Champion lai Novak Djokovic, Rafael Nadal, Dimonic Thiem, Serena Williams, Naomi Osaka leh Simona Halep taw pawh Australia-ah an awm tawh, major tournament an khelh hmain exihibition match an khel ang.