National School Games Boxing-ah Mizoram an champion

65th National School Games, 2019 Boxing Under 17 Boys-ah Mizoram chuan gold medal panga, silver leh bronze medal pahnih ve ve lain an champion. Mizo boxer Laldinsanga chu best boxer atan thlan a ni a, Lalfakzuala chu best judge atan thlan a ni bawk.

Mizoram team chuan an hlawhtlinna hi November 16, Inrinni zana thi Mizoram Boxing Association (MIZBA) president Dr Zorammawia (Ma-a) tan an hlan. R. Dengṭhuama Multipurpose Hall, Mualpuiah nimin khan final khelh a ni a, Mizo boxer pasarih final lut zinga panga - Laldinsanga (50 kgs), Lalrinngheta (52 kgs), H. Lalnunhlima (54 kgs), Lallawmawma (57 kgs) leh Vanlalruatpuia (63 kgs) ten an khingpui ṭheuh an hneh.

48 Kgs-ah Zorammuana chuan Haryana boxer K. Singh Sain a hneh lo a, 60 Kgs-ah Lalnunzira'n a khingpui Haryana boxer tho Vanshal a hneh lo a, silver medal-ah an lungawi a ṭul. Mizo boxer pahnih Franky H. Vanlalruatpuia leh C. Lalhruaitluanga'n ten final lut pha lo mah se bronze medal an lak tho avangin Mizoram aiawha tel boxer pakua ten medal an hlawh chhuak vek a ni.

National School Games Boxing-ah hian Mizoram hian champion turin point 56 an hmu a, anmahni hnaih bertu Haryana hian point 51 an hmu a, anni hian gold medal pathum leh silver medal pali an la. Mizoram hi kum 2001 hnua a vawi khat nan team champion an ni.

Mizoram coach Sete-a chuan, "Kum tluanin boxing training kan nei tawh a, awmze nei taka hun bi neia training rah kan seng a ni. Team boruak a ṭha a, kan naute an huaisen a, sawi angin an hnek thei a ni. MIZBA leh School Education Department-in min thlawp ṭha a, an chungah kan lawm takzet," tiin Vanglaini a hrilh a, an hlawhtlinna chu Pathian hnathawh a nih thu a sawi tel bawk.

November 19-a khelh ṭan National School Games-ah hian ramchhung hmun hrang hrang aṭangin unit 36 an tel a, infiammi leh official-te nen mi 500 vel an fuankhawm a ni.

Inelna thlirna tawi

Gold medal late

Cat    Hming    State/Team

46 kgs    Gopi    Punjab

48 kgs    K.Singh Sain    Haryana

50 kgs    Laldinsanga    Mizoram

52 kgs    Lalrinngheta    Mizoram

54 kgs    H.Lalnunhlima    Mizoram

57 kgs    Lallawmawma    Mizoram

60 kgs    Vanshal    Haryana

63 kgs    Vanlalruatpuia    Mizoram

66 kgs    Dipanshu    DAV CMC

70 kgs    Sahil Chauhan    Maharashtra

75 kgs    K.V.Phogat    Assam

80 kgs    AB Loura    Haryana

80+ kgs    Aman Singh    Madhya Pradesh

Mimal lawmman

Best BoxerLaldinsanga (50 Kgs), Mizoram

Best Looser    Neeraj (70 Kgs), Haryana

Best RefereeRupak Raj Duarah, Arunachal Pradesh

Best Judge    Lalfakzuala, Mizoram