A chung berah Chelsea hnehtu Leicester City

Leicester City chuan Thawhlehni zan khan Chelsea 2-0 in an hneh a, Premier League-ah pakhatna dinhmun an luah. Nizan khan Manchester khaw club pahnih an inkhel a, result a zirin Foxes hi Manchester United leh Manchester City hnuaia awm thei an ni. 

Brendan Rodgers hote hian sum hmang tam Blues lakah goal chance ṭha an ngah zawk a, chak an phu zawk. Mualneitu tan hian Wilfried Ndidi leh James Maddison ten first half-ah goal an khung a, Chelsea-in a chhanletna an nei lo.

King Power Stadium-ah Foxes-in bul an ṭan ṭha a, minute rukna lekah Ndidi chuan box pawn aṭangin goal ban perin a volley goal a, Blues keeper Edouard Mendy tan en liam mai loh chu tih theih dang a awm lo.

Goal khat hian Leicester inrintawkna a siam a, James Maddison chuan hla tak aṭangin minute 15-naah crossbar a pet per. Chelsea rawn insiamremin Reece James leh Thiago Silva ten chance rawn nei mah se keeper Kasper Schmeichel tan hna harsa a ni pha lo. Chutihrualin Callum Hudson-Odoi-a'n goal khung theihna turah goal zawnah a pet lo.

Foxes striker chhuanvawr Jamie Vardy pawhin keeper Mendy chauh a hmachhawn hnuah a pet goal thei lo. Minute 37-naah Johny Evans-a'n Blues attacking midfielder Christian Pulisic a tih tluk avangin referee-in penalty a pe hman a, amaherawhchu VAR hmanga ennawn a nih hnuah freekick a pe ta zawk.

Fulham laka chakna goal khungtu Mason Mount-a'n freekick hi goal zawnah a pet thei lo. Foxes midfielder Maddison erawhin minute 41-naah Marc Albrighton ball vawrhluh chu cool takin a pet goal a, first half-ah 2-0 a ni.

Second half-ah James Justin-a'n vengtu nei lo mah se goal zawnah a tauh thei lo a,  Youri Tielemans pawhin counter attack aṭanga a chance ṭha neih chu goal zawnah pet mah se keeper Mendy-a'n a dansak.

Chelsea-in 65% zet ball posession an nei chungin chance ṭha bik an insiam thei lo. Hun tawp dawn hnaihah Timo Werner-a'n si phurh sut ṭhenah inngai mah se offside vangin pawmsak a ni lo a, 2-0 in Leicester City an chak.

Nipui transfer-ah Chelsea-in pound maktaduai 50-in Leicester City aṭangin Ben Chilwell an lalut a, Foxes hian English left back thlak nan hian English rawlthar James Justin an hmang. Chutihrualin tlarhnung thuamṭhat nan Wesley Fofana (£30m) leh Timothy Castagne (£21m) te an lalut a, player langsar lo an hralh te nena chhiar telin Foxes hi an la hlawk zawk.

Chelsea nen pawh hian kum 20 mi French defender Wesley Fofana hi a khel ṭha a, Foxes tlarhnung pali Justin, Jonny Evans, Fofana leh Castagne bakah keeper Kasper Schmeichel te hi Premier League-a tlarhnung inkawp rem ber zinga mi an ni.

Defence thlawptu Wilfred Ndidi-a'n a hna a hrechiang a, N'Golo Kante hmunruak a luah khat. Premier League an champion ṭuma an player pawimawh Jamie Vardy a la ṭangkai reng a, sum hmang tam lo chunga team ṭha tak din theitu Brendan Rodgers a fakawm hle.

Leicester boss Brendan Rodgers chuan, "Kan rilru put hmang kan pholang a, kan goal nawr apiang kha a hlauhawm zel. Kan khelh dan kha a puitling a, hmuh a nuam hle. Team ṭha tak kan hmachhawn a, Chelsea laka hnehna chang tur chuan khelh ṭhat a ngai a ni," tiin an khelh ṭhat thu a sawi.

Chelsea-in nipui bazarah pound maktaduai 200 chuang an hmang a, pound maktaduai 47.5 man Timo Werner chu bench-ah dah a ni a, Germany international hi tun hnaia a khelh dan thlirin inkhel bul a ṭan lo hi a mak hran lo. Pound maktaduai 71 man Kai Havertz-a'n bul ṭan mah se a khel ṭha lo a, pound maktaduai 33.3 man Hakim Ziyech-a'n a thlak.

A thlawna London club zawmtu Thiago Silva-a'n Chelsea-ah hmun pawimawh chang chho mah se Premier League khel turin a ṭuan fumna a lang leh zauh ṭhin. Foxes nen pawh kum 36 mi Brazilian defender hi chiang takin Vardy-a'n a tlan pel.

Chelsea player-te an khel ṭha lo tlang a, mawhphurtu tur chu manager Frank Lampard a ni. English manager Lampard hnuaia Blues khelh dan thlirin champion an hlat a, bang tura duhtu pawh an pung chho zel.

Inkhelh banah Chelsea boss Frank Lampard chuan, "Player ṭhenkhat an theihna anga khel lo an awm. Goal hnih kan chhuah danah ka lungawi lo a, Leicester nen inel tawk mah ila ho

lam taka goal hnih kan chhuah avangin engkim a harsat phah. Keini aiin an khel ṭha zawk a, kan theihna angin kan khel lo a ni," tiin an khel chhia tih a pawm.

Blues hian Pathianni tlai dar 5:30-ah Luton Town nen FA Cup fourth round an khel ang a, January 27, Nilaini zanah Wolverhampton Wanderers nen Premier League-ah an inkhel ang.