Zanin dar 11:00-ah Manchester City Vs Chelsea
Jose Mourinho rawn letin tunkar tawp Premier League inkhel hmuhnawm ber tura ngaih Manchester City leh Chelsea boruak a vaw dai deuh a, amaherawhchu inkhel chhehvel dahṭhata khelmual chhung chauh thlir chuan zanin dar 11:00-a Eithad Stadium-a inkhel tur hi en a châkawm takzet.
Man City hi champion lai leh nomawi humhim tura rin ni mah se tun dinhmunah chuan Liverpool point riat zetin an pha lo, chu chauh chu a ni lo - Pep Guardiola hote hian Leicester City leh Chelsea pawh pha loin palinaah an awm.
Premier League nomawi la chawi lo Liverpool-in an club chanchina phek thar kai turin kawng dik an zawh a, Jurgen Klopp-a hoten Man City aiin anmahni hnaihtu Chelsea chak an duh zawk ang.
Pep Guardiola leh Frank Lampard te manager an nih hnua an inhmachhawn hmasak ber tur a ni a, hun pawimawh a ni. Blues tana hriat reng tlak loh erawh season liam taa Etihad Stadium an tlawh ṭum kha a ni a, hemi ṭum hian Pep-a enkawl Man City-in 6-0 in an sawp. Sergio Aguero-a'n hattrick siamin, Raheem Sterling-a'n goal hnih khung bawkin Ilkay Gundogan-a'n goal khat a khung ve bawk.
Chelsea-in Maurizio Sarri hnuaiah Europa League an chawi a, Champions League khel turin tling bawk mah se khelmuala an chet danah chuan Lampard-a hnuaia an khelh danah an lawm zawk ngei a rinawm. Club legend Lampard-a'n player naupang chungah rinna a nghat a; Tammy Abraham (10 goals), Christian Pulisic (5) leh Mason Mount (4) ten pathum ringawtin league-ah goal 19 an khung tawh. Tlarhnungah Fikayo Tomori-a'n hmun pawimawh a chang a, Reece James pawh a rintlak chho viau.
Amaherawhchu Lampard hote tana harsa tur chu Pep-a hoten point an mamawh takzet tawh. Man City hian elpui Liverpool khelmual Anfield an tlawh ṭuma kut benga an haw avangin nomawi humhim an duh a nih chuan point hloh a thiang lo a, keeper Ederson a dam leh tawh bawk avangin point thum hmuh ngei an inbeisei ang.
Zanin Inkhel Tur
West Ham United 06:00 PM Tottenham Hotspur
AFC Bournemouth 08:30 PM Wolverhampton
Arsenal 08:30 PM Southampton
Brighton & Hove 08:30 PM Leicester City
Crystal Palace 08:30 PM Liverpool
Everton 08:30 PM Norwich City
Watford 08:30 PM Burnley
Manchester City 11:00 PM Chelsea
November 24, Pathianni
Sheffield United 10:00 PM Manchester United
November 25, Thawhṭanni zan
Aston Villa 01:30 AM Newcastle United