Rooney enkawl Derby an chak

Wayne Rooney-a'n Derby County manager nghet a nih hnuah chak hmel a hmu ta a, Thawhlehni zan khan Rams hian Bournemouth 1-0 in an hneh. Pride Park Stadium-a inkhelah hian Derby tan minute 32-naah Krystian Bielik-a'n goal awmchhun a khung.

Derby hian an match hnuhnung pathumah Sheffield Wednesday, Chorley (FA Cup) leh Rotherham te an hneh lo. Rooney-a'n manager hna a ngheta a chelh hnua an match hmasa berah Rams hian Rotherham an hneh loh avangin relegation zone-ah an awm a, tun ṭuma table chung lama awm Cherries an hneh zarah relegation zone an chhuahsan.

Derby County manager Wayne Rooney chuan, "Huaisen taka kan khelh chuan eng team tan pawh hneh kan harsa. Chutihrualin tha kan thlah erawh chuan kar liam ta mai khan Rotherham United kan hneh lo. Game plan anga kan khelh a, kan thawhrim bawk chuan Championship khel zel turin kan theihna kan nei a ni," tiin relegate loh an tum tur thu a sawi.

Rams hian December thla hlawh an la la kim lo a, hemi chungchang hi sawiin Rooney chuan, "Tute tan pawh hun harsa a ni a, an chinfel vat hi kan tana ṭha ber chu a ni. A pawimawh ber chu player-ten a rang lama an hlawh an lak kim hi a ni a, chumi zawh chuan player thar ka lalut thei ang," tiin inthuam ṭhat an mamawh thu a sawi.

Championship-ah hian team 24 an awm a, a hnuaia awm team pathum an relegate ṭhin. Premier League khel turin team pathum an tling ṭhin a, champion leh pahnihna te an tling nghal. Pathumna aṭanga parukna ten English football inelna sang ber khel turin playoff an khel ṭhin.