Granit Xhaka a rawn kir dawn?

Arsenal captain aṭanga an hnawl hnuah Granit Xhaka chuan team training ṭha takin a zawm leh tawh a, manager Unai Emery chuan mamawh hunah chuan chhawr theih a nih leh tawh thu a sawi.

October thla khan Gunners hi an mikhual Crystal Palace nen an inhnehtawk a, captain Xhaka hi thlak niin Emirates Stadium a chhuahsan tur chu fans lamin an au el a, Swiss midfielder hian a chhang let. Kum 27 mi Xhaka hi a hnu lamah North London club tan hian a la inlan nawn leh lo a, captain a nihna pawh striker Pierre-Emerick Aubameyang hnenah hlan chhawn a ni tawh.

Gunners manager Emery chuan, "Rilru put hmang dik tak nen a rawn kir leh tawh, tun hma ai khan a ngaihtuah dan a dik, kan mamawh chuan inkhel thei a ni leh tawh ang. Player zawng zawngin ṭha taka an khelh theihna tura puih hi kei chuan ka duh.

"International break kan neih hma khan training ṭha takin a nei leh hman, chumi hnuah ram tan ṭha takin a khel leh tawh bawk," tiin chhawr theih a nih thu a sawi. Arsenal hian zanin dar 8:30 hian Premier League match khel turin Emirates Stadium-ah Southampton an mikhual dawn. Saints hi table mawngphah lamah an awm a, an talbuai lai a nih avangin Gunners tan insiamṭhatna hun a ni thei tura ngaih a ni.