Nakkumah Mayweather a lo kir dawn?

Floyd Mayweather chuan boxing chawlhsan tawh mah se infiamna huangah a rawn kir leh ngei dawn niin a hriat, nakkum hian UFC huangah kan hmu thut a nih pawhin a mak lo ang.

Kum 42 mi Mayweather hian instagram lamah a thlalak pho chhuakin, '2020-ah ka rawn let ang' tih thu tawite a ziak bawk a, UFC president Dana White-a nen an inbiak thu hriat tur a awm zui avangin a chanchin hi media lam ngaihven a ni zui nghal.

American boxer ropui Mayweather chuan, "Dana White leh kei hi kan thawkdun leh dawn, nakkum hian thil chhinchiah tlak leh ropui tak kan thlentir ang," tiin a sawi. Boxing a chawlhsan hnuin nikum December thla khan exhibition boxing bout-ah a rawn inlan leh a, hetah hian Japanese kickboxer Tenshin Nasukawa chu second 140 chhung lekin a hnek tlawm der.

Kum 2017-a a infiamna ngainat boxing a chawlhsan hnuah tho UFC fighter Conor McGregor nen 2017 August thla khan Las Vegas' T-Mobile Arena-ah boxing match an lo khel tawh bawk, nakkuma rawn kir a tumna pawh hi a tak a nih ngei a rinawm.