Australia-in India an lawmpui

India-in Border-Gavaskar Trophy kawl chhunzawm turin Thawhlehni khan Gabba-a khelh fourth Test-ah Australia an hneh a, 2-1 in an series an la.

Cricket Australia chuan, "BCCI nena ṭhian ṭhatna, inrintawnna leh inpekna avangin kan lawm a, khawvelin a mamawh zual lai takin series hlawhtling tak kan pho chhuak a ni. Covid-19 buaina kara inelna ṭha tak kan nei thei a, India player, coach leh staff zawng zawng te chungah kan lawm takzet a ni," tiin BCCI lawmpuina thuchhuah an siam.

CA thuchhuahah hian fast bowler pahnih Jasprit Bumrah leh Pat Cummins te, batsman ṭha Ajinkya Rahane leh Steve Smith te bakah ram tana Test match-a vawi khat inlanna Shubman Gill leh Cameron Green te chu an fak bawk.

The Gabba-a India chakpuitu Rishabh Pant chu Test ranking-ah 13-naah a awm chho a, wicketkeeper-batsman zingah a rank a sang ber.

India captain Virat Kohli erawh Test match hnuhnung pathum a khelh loh avangin pathumna aṭangin palinaah a tla thla a, Australian batsman Marnus Labuschagne chu pathumnaah an invawrh chho. Pakhatnaah New Zealand captain Kane Williamson a awm a, Australia batsman Steve Smith-a'n a dawt a ni.

India hian February aṭang hian England nen Test match vawi li an khel dawn a, February 5-9 hian MA Chidambaram Stadium, Chennai-ah Test match hmasa ber an khel ang.

India Test Squad: Virat Kohli (Captain), Rohit Sharma, Mayank Agarwal, Shubman Gill, Cheteshwar Pujara, Ajinkya Rahane (Vice-captain), KL Rahul, Hardik Pandya, Rishabh Pant (wicket-keeper), Wriddhiman Saha (wicket-keeper), R Ashwin, Kuldeep Yadav, Axar Patel, Washington Sundar, Ishant Sharma, Jasprit Bumrah, Md. Siraj, Shardul Thakur