Haaland kan dang thei ang - Silva

Borussia Dortmund goal khung khawl Erling Haaland-a’n chona hautak zawk a hmachawn dawn, zanin dar 1:30-a Champions League last 16-a an hmachhawn tur Paris Saint-Germain defender leh captain ni bawk Thiago Silva chuan Haaland hi an dan theih a beisei thu a sawi.

Haaland hian January thla khan Dortmund hi a zawm chauh, German club tan hian inelna hrang hrangah match ruk khelin goal kua a khung der tawh. A club hmasa Salzburg tan UCL lamah pawh a nep lohzia a lantir tawh avangin PSG tan enghelh tham a tling.

PSG defender Silva chuan, “Match ruk aṭangin goal kua, a ropui takzet. Hetiang ang player chhuak thar ṭha bik nen kan inhmachhawn thei tur hi a lawmawm, chutihrualin an hmaa ding tur hi PSG kan ni ve tho, a tan goal khung a awlsam lo ang.

“Player tumah hi hlauh kan nei lo, hlau lo tih vanga ngainep ni loin kan zah em em tho si. Dortmund tlarhma hriamzia kan hrechiang a, anni lam pawhin kan tlarhma player ho hmachhawn dan tur an zir uluk a ngai ve khawp ang ka ring,” tiin a sawi.

Bundesliga club Dortmund hian Haaland bakah rawlthar duhawm Jadon Sancho an nei a, tawnhriat nei ṭha Marco Reus a awm bawk avangin goal khung kawngah chuan an ngaihtuahawm lo ang.

Dortmund hmatawng ṭhatzia in sawi a hlawh a, chutihrualin bukna hman ni se chuan PSG tlarhma lakah an zang zawk mai thei. Rawlthar Kylian Mbappe hi kum 21 tlin hmaa Champions League goal 19 khung thei hmasa ber a ni - Neymar hliam a dam tawh bawk.

Brazil international Neymar hi hliam tenau vangin match hnih chhung a inkhel tawh lo, coach Thomas Tuchel-a’n a dinhmun an endik leh tur thu sawi mah se Silva erawhin a inlan ngei a ring, “A dinhmun a 

ṭha, inbuatsaihna pawh a nei ṭha,” tiin ram leh club tana a khelhpui chungchang a sawi.

Mbappe leh Neymar te hi kartawpa Ligue 1 an khelh ṭumin an inlan lo, zanina Dortmund hmachhawn tura khek khal an ni. Mauro Icardi leh Edinson Cavani te hi duhthlan tur zawk hriatthiam harsa an ni hial bawk; Dortmund tan khelh fuh loh palh chuan mahni muala mualpho duai theih a ni.