Police-in Ramhlun North dinhmun tiderthawng

Mizoram Police-in Mizoram Premier League semifinal an luh hnuah tha an thlah lo a, Ningani zan khan Ramhlun North 2-1 a hnehin pahnihna an ni chiang. Ramhlun North erawh point kua hmuin tla thei dinhmunah an ding chhunzawm. 

Lammual inkhela goal thum hi inkhelh ṭantirh minute 14 chhunga lut vek a ni. Police tan Malsawmfela leh Lalfakzuala ten an khung hnuah Ramhlun North tan PC Lalruatpuia’n siphurh sut ṭhen nghal mah se hun tawp thlengin goal a luh belh lo.

Minute 10-naa Police goal hi Lalbiakhlua cross Fakzuala tauh chu Ramhlun North keeper Eddie Zorammawia’n dang mah se a per chu Sawmfela’n goal-ah a chantir. Ramhlun North an chesual zui a, Police forward hriam ṭha Fakzuala’n defender ball back pass chu keeper lak hmaa lak khalhin goal-ah a chantir.

Tawnhriat nei ṭha V. Lalchhuanawma chu Ramhlun North tan rawn inlanin ONGC captain hlui freekick pet chu Police keeper Lalṭanpuia’n a dang ṭha hle. Ramhlun North-in minute 14-naah PC Lalruatpuia hmangin goal an khung tho a, Mualṭhuam North tlangval hian ṭha zetin a volley lut.

Mizoram Police-in inkhel thunun chhunzawmin chak phu zawk mah se keeper ṬP-a fak a ṭul. Ramhlun North tlangval ṬP-a hian an veng club dang chatin Lalpekhlua Jongte shot chu ṭha zetin a dang. Ramhlun North hmalam hun nizana Chawnpui FC leh FC Venghnuai result-in nghawng thui tak a nei a, chutihrualin an match hnuhnung bera Chanmari FC nen an inkhel tur a pawimawh tel bawk ang.