Spezia lakah Roma an mualpho

Serie A champion tum zinga mi AS Roma chu an player pahnih hnawhchhuah an nih avangin an che thei lo a, an mikhual Spezia lakah 4-2 in an mualpho a, team ṭha lo zawka ngaih Spezia-in Coppa Italia quarter final an lut.

Thawhlehni zan Stadio Olimpico a inkhelah Spezia lamin Andrij Galabinov (6') leh Riccardo Saponara (15') te goal hmangin hma an hruai a, ball chang hnem leh inkhel thununtu Roma lam an hawihil.

Hun ṭha tam tak an hlah hnuah Roma tan Lorenzo Pellegrini chuan chawlhlawk hma deuhin si phurh a sut ṭhen a, minute 73-naah Arsenal aṭanga an lak ngheh Henrikh Mkhitaryan-a'n si phurh a sut zo, hun pangngaiah goal lut zui loin 2-2 in an inhnehtawk.

Extra time an khel chhunzawm chiah a, Roma defender Gianluca Mancini chu yellow card vawi hnihna hmuh vanga hnawhchhuah a ni. Spezia lamin Roma lamah ball an vawrh phei nghal a, ball umtu forward Roberto Piccoli a tih tluk avangin goalkeeper Pau Lopez chu red card an pe zui.

Roma player pahnih hnawhchhuah inkar hi second 30 chauh a ni! Player pahniha tam zawk Spezia lam an phur thar a, midfielder Saponara-a'n goal a khung belh bakah winger Daniele Verde chuan chak a nemnghet bawk.

Roma coach Paulo Fonseca chuan, "Dik lo leh siamṭhat ngai lai chu a awm tih a chiang, hun kan neih avangin kan sawiho ang. Hma taka goal hnih kan chhuah avang khan thil a harsat phah, vanduai thlak takin player pahnih kan chan bawk," tiin an chak loh chhan a sawi.

Spezia manager Vincenzo Italiano erawh a naute khelh danah a lungawi. Italian manager chuan, "Player zawng zawng an khel ṭha vek, team lian zawk hmachhawn ni mah se hlauh nei loin an khel," tiin a naute a fak hle.