Bucks tan Antetokounmpo a ropui

Giannis Anteto-kounmpo chuan player ropui leh ṭha chungchuang bik a nihzia a lantir chhunzawm zel. Nimin zing khan tun season chhunga a vawi hnih nan triple-double neiin Milwaukee Bucks chu Portland Trail Blazers lakah 137-129 in hnehna a chanpui.

NBA Most Valuable Player nilai Antetokounmpo hian point 24 a neih bakah rebound vawi 19 lain assist vawi 15 a nei bawk. Bucks player zingah point 20 chin bakah 15-rebound leh 15-assist nei tling thei hmasa ber a ni. Milwaukee Bucks hian tun season kal laiah match 12 hnehna an chang tawh a, vawi thum an chak lo thung. Pathianni zing dar 7:00 hian Detroit Pistons nen an inkhel zui leh nghal ang.

Inkhel dangah New Orleans Pelicans chuan Phoenix Suns 124-121 in an hneh. Brandon Ingram (28 points), JJ Redick (26) leh Jrue Holiday (23) te pathum chuan point 77 ngawt thawk chhuakin Phoenix tan an thawhhlawk hle.