ISL khel leh tawh dawn

International break hman zawh a nih hnuah Indian Super League pawh khelh ṭan a ni leh dawn ta a, zanin dar 7:30 hian South Indian derby-ah Bengaluru FC chuan Kerala Blasters an mikhual dawn. 

Bengaluru-ah hian Mizo player Sairuatkima leh Edmund Lalrindika te an awm a, an kum a la nau deuh avangin regular taka inlan tura beisei chi erawh an ni lo. Kerala Blasters-in Lalruatthara leh Samuel Lalmuanpuia an nei a, Ruatthara hi hliam vanga a la talbuai avangin tun season-ah a hmel kan la hmu lo - Blasters tan channa a ni. 

Pathianni zan dar 7:30-ah Odisha FC chuan ATK an mikhual dawn bawk a, Odisha tan Jerry Mawihmingthanga leh Daniel Lalhlimpuia ten hmun pawimawh an chang pha - Lalchhuanmawia Fanai erawh hliam vangin a la inlan thei lo thung.