Title neih let duh Joshua

British boxer rothap Anthony Joshua chuan world champion kawnghren a hloh tawh chu a la let a nih loh chuan boxing-a a sulhnuah a lungawi ngai loh tur thu a sawi. 

Kum 30 mi boxer hian June khan Andy Ruiz Jr a hmachhawn a, mipui rin loh taka chak loin WBA (Super), IBF, WBO leh IBO heavyweight title a kawl lai te chu a hloh vek. Boxer pahnih hi December 7 khian Saudi Arabia-ah an inhnek leh dawn a, Joshua hian a kawnghren hloh tawh neih let leh ngei a tum. Andy Ruiz a hmachhawn hma zawnga vawi 22 inhneka chak vek boxer chuan, "Title te hi ka nei let leh a nih loh chuan ka hlim thei lo ang. 

"Andy hi ka hneh ngei dawn a ni," a ti a, vawi khat champion a lo nih tawhnaah a lawm leh lawm loh zawhna chu, "December 8-ah chuan zawhna dang hlir min zawt tawh ang," tiin a chhang a, chak ngei a tum ruh hle.