Semifinal-ah Canada an lut

Canada chuan Australia hnehin Davis Cup semifinal an lut a, zanin hian Russia leh Serbia te inkhela chak zawk nen final luh an inchuh zui leh nghal dawn a ni.

Ningani zan quarterfinal inkhelah ram pahnihte 1-1 in an inhnehtawk a, doubles hmangin tlang tur zawk chinfel a ni. Canada tan hian Vasek Pospisil leh Denis Shapovalov te ṭangdun chuan John Peers leh Jordan Thompson te 6-4, 6-4 a hnehin an ram an chakpui.

Singles lamah Pospisil chuan John Millman 7-6, 6-4 in a hneh a, Australia tan Alex de Minaur chuan Shapovalov 3-6, 6-3, 7-5 a hneh letin 1-1 a ni a, doubles lama chak Canada hian 2-1 in hnehna an chang ta zawk.