Lalmalsawma Memorial Futsal Ṭha tura ngaih Chhinga Veng leh Saikhamakawn an tla

Lalmalsawma Memorial Futsal MFA Inter Village Futsal Tournament 2020 chu nimin khan khelh ṭan a ni a, futsal khel ṭhang veng Chhinga Veng leh Saikhamakawn an tla.

Match hmasa berah Zuangtui LC-in 7-2 ngawtin Chhinga Veng LC 'A' an hneh a, amaherawhchu Chhinga Veng hi team hnihin an chhuak. Chhinga Veng LC 'B'-ah talent nei ṭha Lalchungnunga leh Lalsawmzela te an awm a, result mak tih tur a ni lo.

Luangmual LC 'A' leh Saikhamakawn LC te an inhnehtawk a, amaherawhchu Saikhamakawn vanduai ta zawkin 5-3 in an chak lo. Futsal club Thyristor awmna veng Ramhlun Venglai LC-in harsatna an tawk lo, Dawrpui Vengthar LC 7-0 in an sawp.

Aizawl khaw pawn team zingah Biate an ṭha a, an phu ang ngeiin Tuithiang LC lakah 3-0 in hnehna an chang. Futsal inelna ṭan niah match li chauh a awm a, first round hi February 22, Inrinniah a tawp ang. Vawiin aṭangin ni khatah match 12 zel a awm dawn.