Snodgrass chungchang an chhui dawn

Thawhlehni zan Premier League inkhelah West Ham chuan an mikhual West Brom 2-1 in an hneh a, he inkhela inlan lo Robert Snodgrass chungchang chu EPL-in a chhui chiang dawn.

Kum 33 mi Snodgrass hian January 8 khan Hammers aṭangin West Brom hi thla 18 chhung atan a zawm, a man tarlan a ni lo. Kar hmasa khan Wolves lakah a match hmasa ber khelin a team a chak pui - a club hlui lakah erawh a inlan lo.

West Brom manager Sam Allardyce chuan, "Club pahnih inremna," tiin Snodgrass-a'n a club hlui a hmachhawn loh chhan a sawi a, league thuneitu lam chuan an inremna hi dan kalh a ni em tih an chhui dawn a ni.

Premier League player in leisak dan pangngaiah chuan, a ngheta an in lei a nih chuan club hlui hmchhawn theih tur a ni. Loan hmanga an la a nih erawh chuan inhmachhawn thei lo tura inrem theih erawh a ni thung.

Chak lo Baggies hi table mawng lamah an talbuai chhunzawm a, hnehna changtu Hammers erawhin point 32 neiin pasarihna dinhmun an luah. Premier League an khelh aṭangin match hmasa 19 aṭanga an hmuh hnem ber ṭum a ni.

West Ham manager David Moyes chuan, "Hmasawnna hmuh tur a awm zel, kan theihna ang takin kan khel thei. Zawimuangin hma kan sawn zel ang a, a sang thei ang ber thlen kan tum ang," a ti.