Dortmund an chak lo

Hun tawp dawna rawlthar Florian Wirtz goal hmangin Bayer Leverkusen chuan Borussia Dortmund 2-1 in an hneh a, chak lo Dortmund tan Bundesliga title a hla sawt.

Thawhlehni zan inkhelah mualneitu Leverkusen lamin minute 14-naah Moussa Diaby hmangin goal hmahruai an khung, second half-ah Julian Brandt hmangin sut mah se hun tawp hma minute 10 chauh awm tawhah Wirtz -a'n chakna goal a khung.

Dortmund hi an match hnuhnung zawkah Mainz nen 1-1 in an inhnehtawk tawh bawk, an coach thar Edin Terzi kaihhruaina hnuaiah match ruk an khelh aṭangin vawi hnih an tlawm ta.

Nizan khan champion lai Bayern Munich an inlan a, an chak a nih chuan Bayern leh Dortmund inthlauhna chu point 10 zet a ni tawh ang.

Hnehna changtu Leverkusen erawh Union Berlin an ngam loh hnuah an tho chhuak nghal a, hmahruaitu Bayern an phak lohna chu point li a ni - match khatin an khel hnem zawk thung a ni.

Inkhel dangah Andrej Kramaric goal hnih leh Sebastian Rudy goal khat hmangin Hoffenheim chuan Hertha Berlin 3-0 in an hneh. Table-a 14-na Berlin an chak loh avangin tun hnaia ban tur anga sawi Bruno Labbadia hma hun a chiang lo zual.