Hazard kir zanah Real chak zo lo

Thla thum dawn ke rek hliam vanga a inlan theih loh hnuah Eden Hazard chuan khelmual a rap ve leh ta a, mahse Cristiano Ronaldo hmun ruak luahtu tura an lakluh rawn kir zanah Real an chak zo lo. 

Pathianni zan khan Real Madrid hian Celta Vigo an mikhual a, 2-2 in an inhnehtawk. Inrinni zanah Barcelona an chak bawk si avangin Real hmahruaina a der-thawng sawt. 

Real Madrid hian match 24-ah point 53 an nei a, anmahni hnaih bertu Barca aia an sanna hi khelh zat in angah point khat chauh a ni. La Liga inum a ngaihnawm chho zel dawn. 

Santiago Bernabeu-a inkhelah Celta Vigo hian Fedor Smolov hmangin hma an hruai a, mahse Toni Kroos leh Sergio  Ramos ten an chhanglet. Celta tan Santi Mina chuan rawn khung ve lehin 2-2 in a tawp. 

Pathianni zana Bernabeu an lenluh hma hian Celta Vigo hi La Liga-a Real an lenchilh hnuhnung pasarihah an tlawm vek a, an record a ropui lo hle. 

Mahse, Pathianni zanah thawnthu thlak danglam an tum a, minute sarihna lekah Real an barakhaih - Iago Aspas siamsak chu Smolov chuan goal-ah a chantir a, January-a loan hmanga Celta a pan hnua a goal hmasa ber a ni. 

Real-in Barca an chak tih an hria a, tlawm an tum lo. Second half-ah Toni Kroos leh Sergio Ramos ten an rawn chhanglet a, mahni muala khel an nih bawk avangin Real-in chak an beisei. 

Mahse, hun tawp nan minute nga chauh a awm tawh tihah Celta-in thil an rawn thlak danglam a, Denis Suarez-a siamsak chu Santi Mina chuan goal-ah chantirin 2-2 in inkhel a tawp.

Nipui laiin Real Madrid-in pound maktaduai 150-in Eden Hazard an lalut a, kar khatah £400,000 an hlawhtir bawk avangin beiseina an nei sang tih 

a chiang. 

Mahse, Chelsea forward hlui hian match 13 lek khela goal khat a khungsak hnuin hliam vangin a chawlhsan a, Pathianni zanah a lo kir - a lo kir zanah a khel ṭha a, goal erawh a keng tel lo. 

Real hi chak phu zawk anga sawi theih an ni a, Welsh forward Gareth Bale-a hun ṭha khawhral te, Sergio Ramos goal khung an pawmsak lohte chu an vanduai belhchhahtu a ni. 

Kum 2012 hnua vawi khat chauh league nomawi la chawitu Real tan nomawi beiseina a derthawng leh ta a, league match 14 lai khelh tur a la awm bawk avangin thil tam tak a la danglam thei.