Phalna nen beer leh wine siam theih a ni Hun bik atan rakzu siam leh zawrh a theih

The Mizoram Liquor Prohibition (MLP) Rules, 2019 hnuaiah phalna (license) nei tan chuan Mizoramah beer leh wine siam leh zawrh theih a ni a, Mizoram chhunga siam zu (rakzu) pawh hun bikah permit nei tan chuan siam theih a ni. Hetih lai hian, phalna neite'n sapzu an lei theihna hmun tur kudam sorkarin a siam dawn bawk.

MLP Act tihchhuah a nih hnuah Mizoramah zu, beer leh wine-te khap a ni a, MLP Act hnuaia Rules (MLP Rules) siam thar chu December 19, 2019 khan tihchhuah a ni. MLP Rules chuan Mizo­ramah beer leh wine siam leh zawrh a phal a, hun bikah chuan rakzu pawh siam theih a ni dawn.

Hetih lai hian, state páwn lam aṭanga zu lakluh erawh zawrh erawh phal a ni lo a; phalna neite erawh chuan Excise & Narcotics department aṭangin sapzu an lei thei thung. Rules-a a lan danin, wine leh beer siamna atan extra neutral alcohol emaw rectified spirit la lut turin phal­na neih a ngai a, Excise & Narcotics Commissioner hnenah dilna thlen tur a ni.

Dilnaah chuan an lakna hmun tur distillery/distributor hming, extra neutral alchohol emaw, rectified sipirt-a alcohol tam zawngte leh thil ṭul dangte an tarlang tur a ni. Mizoram aṭanga beer leh wine siam chhuahte chu phalna nei lo chuan hmun dangah zawrh chhuah phal a ni lo a, phalna nei turin dilna thehluh dawna thil tel tur chi hrang hrang a awm.

Mizoram sorkar chuan phalna neite'n zu an lei theihna hmun tur dawr a siam dawn a, chu chu sokarin emaw, sorkarin a ruat officer-in emaw an enkawl ang. MLP Act hnuaia zu man, chinfel tawh (confiscated liquor)-te chu sorkarin kudam a siamah dah a ni dawn a, office mawh­phur tuin phalna neite hnenah a pe chhuak thei dawn a ni.

Phalna neite hnena zu pek chhuah turte chu a quality leh brand a zirin sorkarin a man a bituk dawn a, permit neitute chu an permit-a an lei theih zat tur tarlan ang zela leitir an ni ang. Hriselna dinhmun vanga permit neite pawh vantlang hmun, zirna in, hotel leh mipui tamna hmunah zu in phalsak an ni lo a, in tur zat chawh aia tam in phalsak an ni lo bawk.