Man United 'comeback' a ṭhuanawp

Bramall Lane-ah Manchester United-in goal hnih an chhuah hnuah an academy aṭanga inzir chhuak Brandon Williams, substitute Mason Greenwood leh Marcus Rashford te hmangin an chhanglet a, mikhual team hi chak turah inngai hman mah se Sheffield United-in Oliver McBurnie hmangin siphurh an sut a, 3-3 in inkhel a tawp.

Pathianni zan inkhelah Ole Gunnar Solskjaer hoten point khat chauh an hlawhchhuah avangin Jose Mourinho kaihhruai Tottenham Hotspur nen point 17 ve ve an hmu a, Arsenal point khatin an pha lo. United leh Gunners point hmuh zat belhkhawm hi point 35 a ni a, hmahruaitu Liverpool hmuh aiin point hnihin a tlem zawk.

Manchester United-in dinhmun siam ṭhatna turah ngaiin Bramall Lane an tlawh a, amaherawhchu midfielder Scott McTominay leh Paul Pogba te tel lohna United team-in midfield ho khawmtu an nei lo. Sheffield chu first half-ah team ṭha zawk an ni a, keeper David de Gea awm lo se chuan goal tam zawk an khung ngei ang. Spanish keeper De Gea hian Blades tana John Lundstram leh David McGoldrick te khung tur a dang ṭha takzet.

United tlarhmain Sheffield second keeper Simon Moore an tibuai pha lo a, an tlarhnung erawh an talbuai hle. Phil Jones chu khelh thut talbuai aṭanga insiamṭhat a hnekin a buai tulh tulh a, minute 19-naah Lys Mousset-a'n United defender Jones hi a nek tluk hnuah a chhuhsak a, John Fleck khung tura siamsakin first half-ah 1-0 a ni.

Second half-ah Jones aiah Jesse Lingard rawn lutin United inkhel a danglam phah lo a, Sheffield-in counter attack hmangin minute 52-naah an goal hnihna an khung. Goal hmahruai siamsaktu Mousset-a'n box pawn aṭangin ṭha zetin goal kilah a pet goal. Inkhelh banah Solskjaer chuan, "Mualphona lian zawk a thlen ka hlau hle," tiin 2-0 a an hnufual lai chanchin a sawi a, an khelh dan thlirin a thusawi hi a pawmawm hle.

Sir Alex Ferguson laia United 'comeback' pui ṭhintu zinga mi Solskjaer-a kaihhruai team-in tlawm mai an tum lo a, academy player-te'n lawmna an thlen. Minute 72-naah kum 19 mi left-back Brandon Williams-a'n goal rawn khungin United tan phurna a siam a, minute nga hnuah Rashford-a siam chu kum 17 mi Greenwood-a'n siphurh sut nan a hmang.

Mit khap kar lekah United dinhmun a rawn ṭha zawk a, minute 79-naah Rashford-a'n hmahruaina goal a khung. Ryan Giggs, Paul Scholes leh David Beckham te pathumin April 1996-a goal an khung hnuah United player kum 22 leh a hnuai lamin goal an khung lehna hmasa ber a ni. 

United manager Solskjaer-a'n point thum beiseiin Antonio Martial aiah defender Axel Tuanzebe a luhtir a, an siphurh humhim an tum. Sheffield erawhin point hmuh ngei tumin forward Billy Sharp te an la luhtir thung a, chak teuhah duh tawk loin point hmuh ngei an tum.

A tawpah Sheffield-in an huaisen rah an seng a, minute 90-naah Callum Robinson cross chu Oliver McBurnie-a'n ṭha zeta la thlain chiang zetin a pet goal. VAR a inrawlh avangin Sheffield ṭantute hlauthawngin an awm a, amaherawhchu uluk taka replay enlet hnuah pawh McBurnie-a'n a kutin ball a control tih a chian loh avangin goal-ah pawm a ni.

Premier League kaithar Sheffield United-in point hlu tak an hlawh chhuak a, point 18 hmuin paruknaah an awm. Chris Wilder hote thlen chin hi sawi nep theih a ni lo - an hnuaiah big six zinga pathum Arsenal, Man United leh Tottenham te an awm tlat.