Argentina-ah Mascherano a kir dawn

Barcelona defender hlui Javier Mascherano chu a pianna ram Argentina lamah a kir leh dawn niin a lang a, an ram club Estudiantes de La Plata chuan Liverpool tan pawha lo khel tawh player lalut tura inremna an neihpui thu a tarlang. 

Kum 35 mi Mascherano hian January 2018-ah khan Barcelona chhuahsanin Hebei China Fortune a zawm a, Chinese Super League club-a a contract hi December 31-ah a tawp tawh dawn avangin kum tharah Argentine club hi a zawm ang. 

Centre-back leh defensive midfielder anga chhawr kawp theih Mascherano hian 2003 khan an ram club River Plate-ah a career a ṭan a, kum 2006 khan Brazilian club Corinthians aṭangin West Ham a zawm. Hammers-ah hian thla nga chiah hun a hman hnuin Liverpool a zawm a, English club ṭhaah a hming a chher hnuin kum 2010 khan Barcelona a zawm - Catalan club tan nomawi chawi theih zawng zawng a chawi kim. 

Argentina tana vawi 147 inlan thei Mascherano hi Estudiantes president Juan Sebastian Veron (Manchester United midfielder hlui) chuan zanriah a kilpui thu leh inremna a neihpui thu a sawi a ni.