AFC hian Mizo mipui puihna a mamawh - Standly Rosario, Aizawl FC Coach

I League hun a hnai a, Aizawl FC-in an match hmasa berah tun Inrinni hian Kolkata club ṭha Mohun Bagan an mikhual dawn. RG Stadium, Mualpuiah Mizo club leh Bagan te an inkhel dawn a, AFC coach Standly Rosario chuan Mizo mipui puihna an mamawh thu Vanglaini a hrilh.

Standly Rosario chuan, "MPL-ah chuan mipuiin club hran hran kan ṭan a ni thei a, I League-ah erawh Aizawl FC hi kan ṭan tur a ni. Kan team hi player naupang te te an nih hlawm avangin mipui puihna kan mamawh a, fuih phur an mamawh a ni," tiin a sawi a, Aizawl FC chu football hmanga Mizoram tihmingṭhatu an nih thu a sawi lang bawk.

Tun season-ah Aizawl FC-in academy player naupang senior team-ah an sawn chho a, tawnhriat nei player leh foreigner pahnih Alfred Kemah Jaryan leh Richard Kassaga te nen Standly hnuaiah inkawp remin MPL league round-ah pakhatna an ni. 

Aizawl FC coach Standly chuan sawi chhunzawmin, "Kan naute hi ka ringtawk a, kan player neih ang hi ṭha thei ang bera chhawr ka tum. Chutihrualin kan khingpui tur Mohun Bagan hi kum 100 chuang an ni tawh a, kum tinin team ṭha ber zinga mi an ni. Aizawl FC hian hneh turin theihna kan nei a, player piah lamah Mizo mipuite pawhin tih tur an nei a ni," tiin India ram club ṭha elpha tura ṭanrual a ṭul thu a sawi nawn.