Ronaldo a dam fel tawh?

Juventus manager Maurizio Sarri chuan Atalanta lakah Cristiano Ronaldo chhawr thei lo mah se, zanin dar 1:30-a Atletico Madrid nen Champions League an khelh hunah erawh chhawr theih a inbeisei.

Ronaldo hi Portugal tan Euro Qualifier lamah a inlan a, club lamah training zawm zui nghal mah se Inrinni zan Serie A inkhelah Italian champion tan a hmel hmuh tur a awm lo. Italian manager Sarri chuan, "A khupah hliam a nei a, duhthusamin a training thei lo. Champions League a khelh theih ka beisei a, chutihrualin inkhel turin a rilru a inpeih em tih a pawimawh tel bawk," a ti.

Juve hi group D aṭangin an tling tawh a, zaninah hian hnehna an chang a nih chuan hmahruaitu an ni nghal bawk ang. Atletico erawh an chak lo a nih chuan last 16 lut chiang turin match hnuhnung ber an nghah thlen a ngai thei dawn.

Turin club hi hliam vangin an buai mek. Captain Giorgio Chiellini a la dam lo a, player dang Federico Bernardeschi, Douglas Costa leh Adrien Rabiot te an la inlan theih dawn loh bakah Alex Sandro leh Matthijs de Ligt te dinhmun a chiang lo bawk.

Netherlands interna-tional De Ligt hi Chiellini awm loh karah tlarhnung lailum luahtu a ni. Mahse, Atalanta nen an inkhelh ṭumah a darah hliam tenau a tuar a, nimin tlai thleng kha chuan a dinhmun hi a la chiang lo. Atletico Madrid lam pawh hliam vangin an buai ve tho. Manager Diego Simeone-a'n Diego Costa, Jose Gimenez leh Stefan Savic te a chhawr thei dawn bik lo a, an ṭhat dan berin an inlan thei dawn bik lo tihna a ni.